Мамлекеттик ипотекалык компанияга жаңы жетекчи дайындалды

Мамлекеттик ипотекалык компания Башкармалыктын жаңы төрагасын дайындады.

Ведомстводон билдиришкендей, “Мамлекеттик ипотекалык компания” ААКнын директорлор кеңеши Талант Табылбекович Жекшеновду Башкармалыктын төрагасы кылып дайындады.

1982-жылы туулган Талант Жекшенов эки жогорку билимге ээ: Жусуп Баласагын атындагы Кыргыз улуттук университетинин юридикалык жана И. Раззаков атындагы Кыргыз мамлекеттик техникалык университетинин тоо-кен иштери боюнча диплому. Ал ошондой эле Шералы Сыдыков атындагы Олимпиадалык резервдердин адистештирилген мектебинин бүтүрүүчүсү.

Талант Жекшенов көп жылдар бою мамлекеттик уюмдарда, анын ичинде президенттин Иш башкармалыгынын алдындагы “Спорттук комплекс” мамлекеттик ишканасынын директору, президенттин Иш башкармалыгынын алдындагы “Ала-Арча” мамлекеттик жаратылыш паркынын директору жана “Кыргызкөмүр” мамлекеттик ишканасынын директорунун орун басары кызматтарын ээлеген. Ал олуттуу башкаруу тажрыйбасына ээ жана өзүн жоопкерчиликтүү жана натыйжалуу жетекчи катары көрсөттү.

Талант Жекшеновдун дайындалышы “МИК” ААКнын башкаруу тобун чыңдоого жана анын ишинин натыйжалуулугун жогорулатууга багытталган.

Башкаруу кеңешинин мурунку төрагасы пландаштырылган ротациянын алкагында башка кызматка которулуп жаткандыгына байланыштуу кызматынан бошотулду.