“Кытай-Кыргызстан-Өзбекстан” темир жолун куруу боюнча Инвестициялык макулдашууга кол коюлду
Кыргыз Республикасынын Президентинин “Ынтымак-Ордо” Администрациясында Кыргыз Республикасынын Министрлер Кабинети менен “Кытай-Кыргызстан-Өзбекстан” темир жолу компаниясы” жоопкерчилиги чектелген коомунун ортосунда Инвестициялык макулдашууга кол коюу аземи болду.
Инвестициялык макулдашууга Кыргыз Республикасынын Министрлер Кабинети тарабынан – Кыргыз Республикасынын Транспорт жана коммуникациялар министри Абсаттар Сыргабаев, ал эми инвестор тараптан – “Кытай–Кыргызстан–Өзбекстан” темир жолу компаниясы” ЖЧКсынын директорлор кеңешинин төрагасы Чжун Шэнгуй кол койду.
Анда сөз сүйлөгөн Кыргыз Республикасынын Министрлер Кабинетинин Төрагасынын орун басары — Суу ресурстары, айыл чарба жана кайра иштетүү өнөр жайы министри Бакыт Төрөбаев, бул маанилүү “Кытай-Кыргызстан-Өзбекстан” темир жолун долбоорлоо, куруу, каржылоо, эксплуатациялоо жана техникалык тейлөө боюнча Инвестициялык макулдашууга кол коюлуп жаташы сүйлөшүүлөр процессинин узак жана татаал мезгилинен аймактык жана эл аралык мааниси терең масштабдагы инфраструктуралык долбоорду ишке ашыруунун практикалык планына өтүп жатканын билдирди.
“Бардыгыңыздарды бүгүн кол коюлган инвестициялык макулдашуу боюнча биргелешкен ишиңиздердин ийгиликтүү аякташы менен куттуктайм. Биздин мамлекеттердин жетекчилеринин колдоосу жана чечкиндүүлүгү болбосо маселенин мындай ийгиликтүү илгерилеши мүмкүн эмес эле. Жетекчилерибиздин ар тараптуу колдоосу менен гана бүгүн биз бул долбоордун фундаменталдык документтеринин бирине кол коюуга мүмкүнчүлүк алдык”, — деди МинКаб Төрагасынын орун басары Бакыт Төрөбаев.
Ал эми Кытай жана Өзбекстан тараптан, Кытай Эл Республикасынын Кыргыз Республикасындагы убактылуу ишенимдүү өкүлү Ли Баоцзе жана Өзбекстан Республикасынын Кыргыз Республикасындагы Атайын жана Ыйгарым укуктуу Элчиси Саидикрам Ниязходжаев баштаган делегация мүчөлөрү катышты.
Иш-чарага катышкандар, “Кытай-Кыргызстан–Өзбекстан” темир жолун куруу — бул долбоорго катышкан өлкөлөрдүн транспорттук инфраструктурасын өнүктүрүү стратегиясынын маанилүү элементи экенин жана өлкөлөргө социалдык-экономикалык натыйжаны гана алып келбестен, региондор аралык байланыштарды чыңдаарын билдиришти.
Белгилей кетсек, үстүбүздөгү жылдын 27-декабрында “Кытай – Кыргызстан – Өзбекстан” темир жолунун курулушун баштоого старт берилет.
