Кыргызстанда жыл соңуна чейин 20 мунай скважинасы ишке берилет
Кыргызстанда жыл соңуна чейин 20 мунай скважинасы ишке берилет. Бул тууралуу Энергетика министрлигинен кабарлашты.
Ведомствонун маалыматында белгиленгендей, “Кыргызтранснефтегаз” мамлекеттик ишканасы “Кыргыз-Түрк К-НефтьГаз” ААКсы менен биргеликте 7 мунай скважинада оңдоо жана даярдоо иштери жүргүзүлүп, 2024-жылдын 25-сентябрынан тартып мунай өндүрүлүп баштады. 2024 жылдын аягына чейин дагы 20 скважина ишке берилет.
Ошондой эле “Кыргыз-Түрк К-НефтьГаз” ААКсы тарабынан Баткен облусунун Кадамжай районунда өндүрүш кубаттуулугу суткасына 500 тонна мунайды кайра иштетүүчү завод курулушу акыркы этабы аткарылууда.
Нефть өндүрүү жана кайра иштетүү иштеринин башталышы менен 350-400 жумушчу оруну түзүлөт. Инвестициянын жалпы көлөмү 90 млн АКШ долларына жетет.
Белгилей кетсек, Кадамжай районундагы “Түндүк Сох” жана “Чоңгара Галча” мунай кендерин биргелешип иштетүү долбоорун ишке ашыруу үчүн 2024-жылдын 9-февралында мунай жана газ өндүрүү үчүн лицензиялык келишим алынган. Ага ылайык, “Кыргызтранснефтегаз” мамлекеттик ишканасы менен “Кыргыз-Түрк К – НефтьГаз” ААКсы мунай өндүрүү жана даяр продукцияны сатуу боюнча биргелешип иштейт.
