Кыргызстанда турак жайын камсыздандыргандардын саны өстү

Кыргызстанда турак жайын камсыздандыруу маданияты өнүгүүдө. Бул тууралуу “Биринчи радиого” Экономика жана коммерция министрлигинин банктык эмес финансы рынокторунун саясаты бөлүмүнүн башчысы Азамат Саматов билдирди.

Анын айтымында, турак жайларды милдеттүү камсыздандыруу мыйзамы 2012-жылы кабыл алынган, бирок азыркы күнгө чейин толугу менен иштей элек.

“Тилекке каршы бул мыйзам толугу мнене ишке ашырыла элек, муну моюнга алыш керек. Бирок мамлекеттик органдар жеке компаниялар менен биргеликте бул багытта активдүү иштеп жатат. Бүгүнкү күндө 1 млн 200 миң турак жай фондусунун 20%дан ашыгы камсыздандырылды. Бир канча ай мурда бул көрсөткүч эки эсе аз болчу”, – деди Саматов.

Ошондой эле ал 2024-жылы Мамлекеттик камсыздандыруу уюму 60 млн сомдон ашуун каражатты төлөгөн.

“Турак жайды камсыздандыруу шаарда 1200 сом, айыл жергесинде 600 сомду түзөт”, – деп кошумчалады ал.