Кыргызстанда билим берүү кызматтарынын сапатын жогорулатууга 11,2 млрд сом бөлүнөт
2024-2025-окуу жылында адамдык капиталды өнүктүрүү максатында көрсөтүлүүчү билим берүү кызматтарынын сапатын жогорулатуу үчүн республикалык бюджеттен жана башка булактардан 11 млрд 25,4 млн сом кошумча бөлүнөт. Бул тууралуу министр Догдуркүл Кендирбаева 4-ноябрда Бишкекте өткөн “Адамдык капитал жана туруктуу өнүгүү” аталышындагы улуттук форумда билдирди.
Министрдин билдирүүсү боюнча бөлүнгөн каражаттар төмөнкүдөй максаттарга жумшалат:
- мектепке чейинки билим берүүнү өнүктүрүүгө 3 млрд 408 млн сом (анын ичинен 408 млн сом – жаңы бала бакчалардын иштөөсүнө, 3 млрд сом – уктоочу жайларды окуу бөлмөлөрүнө кайра форматтоого жана жаңы топторду түзүүгө);
- окуу китептерин даярдоого жана басып чыгарууга 2 млрд сом;
- окуучуларды ысык тамак менен камсыздоого 2 млрд 800 млн сом (жылына 1,4 млрд сомдон);
- мугалимдер үчүн ноутбуктарды сатып алууга 1 млрд 364,4 млн сом (2024-жылы 678 млн сом, 2025-жылы 686,4 млн сом);
- мектептер үчүн компьютерлерди сатып алууга 100 млн сом;
- мектептердин муктаждыктарын канааттандырууга 1 млрд 353 млн сом (анын ичинен 416 млн сом – мектептердин окуу чыгашаларына, 134 млн сом – окуу эмеректерине, 803 млн сом – мектептердин учурдагы ремонтуна (жылына 401,5 млн сомдон).
