Кыргызстан менен Тажикстандын өкмөт башчылары эки тараптуу кызматташууну тереңдетүүнүн келечегин талкуулашты

Министрлер Кабинетинин төрагасы Адылбек Касымалиев Душанбеге болгон иш сапарынын алкагында Тажикстандын премьер-министри Кохир Расулзода менен тар форматта жолугушуу өткөрдү.

Адылбек Касымалиев жылуу кабыл алгандыгы үчүн ыраазычылык билдирип, Кыргызстандын тышкы саясатынын алкагында Борбор Азия өлкөлөрү, анын ичинде Тажикстан менен ынак коңшулук мамилелерди өнүктүрүү артыкчылыктуу экендигин баса белгиледи. Ал президент Садыр Жапаровдун Тажикстандын президенти Эмомали Рахмонго жолдогон жылуу саламын жеткирди.

Тараптар конструктивдүү диалогдун жүрүшүндө эки тараптуу кызматташтыктын актуалдуу маселелеринин кеңири спектрин дыкат талкуулашты, соода-экономикалык байланыштарды өнүктүрүү келечегине өзгөчө көңүл бурушту. Атап айтканда, өлкөлөр ортосундагы товар жүгүртүүнү 2030-жылга чейин  500 миллион АКШ долларына чейин көбөйтүү боюнча жалпы максат белгиленди.

Кыргыз тарап Евразия экономикалык биримдигинин (ЕАЭБ) рыногуна тажик продукциясын жеткирүү үчүн натыйжалуу байланыштыруучу звено катары чыгууга даярдыгын ырастады жана айыл чарба продукциясын кайра иштетүү жаатында тажик тажрыйбасын изилдөөгө кызыкдар экендигин билдирди.

Энергетика тармагындагы ийгиликтүү кызматташтыкка олуттуу көңүл бурулуп, “CASA-1000” долбоорун тез арада ишке ашыруунун маанилүүлүгү айтылды. Тараптар эки тараптуу байланыштарды активдештирүүнүн маанилүү фактору катары Кыргызстан менен Тажикстандын ортосундагы түз аба каттамдарын жандандыруу зарылдыгын белгилешти.

Аягында алар Кыргызстан менен Тажикстандын ортосундагы өз ара пайдалуу өнөктөштүктүн мындан ары бекемделишине жалпы ишенимин тастыктап, маданий-гуманитардык кызматташуунун өзгөчө маанилүүлүгүн жана жаш муундар арасында жалпы маданий мурастарды жайылтууну колдоо зарылдыгын да белгилеп өтүштү.