Кыргызстан менен Казакстан саламаттык сактоо тармагында кызматташтыкты өнүктүрөт
Кыргызстандын саламаттык сактоо министри Алымкадыр Бейшеналиев Казакстандын саламаттык сактоо министри Акмарал Альназарова менен жолугушту.
Министрликтен билдиришкендей, жолугушуу күн мурун Астана шаарында Шанхай Кызматташтык Уюмуна (ШКУ) мүчө мамлекеттердин саламаттык сактоо министрлеринин 7-жыйынынын алкагында болуп өттү.
Жолугушууда Кыргызстан менен Казакстандын ортосундагы саламаттык сактоо тармагындагы эки тараптуу кызматташуунун актуалдуу маселелери талкууланды.
Бейшеналиев кесиптешин кызматка дайындалышы менен куттуктап, эки өлкөнүн ортосундагы салттуу достук жана бир туугандык мамилелерди таанууну билдирди. Ал ошондой эле саламаттык сактоо тармагындагы бардык актуалдуу маселелер боюнча эки өлкөнүн министрликтеринин жемиштүү кызматташтыгын баса белгиледи.
Министрлер баштапкы медициналык-санитардык жардам кызматтарын өнүктүрүү, ар түрдүү тармактарда, анын ичинде фармацевтикалык жана санитардык-эпидемиологиялык кызматтарда, жугуштуу жана жугуштуу эмес оорулардын алдын алуу жана көзөмөлдөө боюнча кызматташууну улантуу, ар кыл багыттагы адистердин квалификациясын жогорулатуу боюнча күч-аракеттерди бириктирүү боюнча макулдашты.
Бул жолугушуу медициналык кызмат көрсөтүүлөрдүн сапатын жогорулатууга жана эки өлкөнүн калкын заманбап дарылоо ыкмаларына жана дары-дармектерине жеткиликтүүлүктү камсыз кылууга багытталган Кыргызстан менен Казакстандын ортосундагы саламаттык сактоо тармагындагы кызматташтыкты чыңдоонун кезектеги кадамы болуп саналат.
