Кыргызстан дүйнөлүк платформаларда тоолуу аймактарды өнүктүрүү боюнча глобалдык күн тартибин активдүү илгерилетүүдө
Кыргызстандын делегациясы Германиянын Бонн шаарында өтүп жаткан БУУнун (SB60) Климаттык конференциясынын алкагында тоолор жана климаттын өзгөрүүсү боюнча глобалдык эксперттик диалогго катышты.
Делегацияны министрлер кабинетинин төрагасынын орун басары Эдил Байсалов жана президенттин “Тоолуу аймактарды өнүктүрүү боюнча беш жылдык аракеттерди” ишке ашыруу боюнча атайын өкүлү Динара Кемелова жетектеп барган.
Бул Диалог биринчи жолу 2023-жылы Дубайда өткөн Климаттын өзгөрүшү боюнча БУУнун Алкактык Конвенциясынын (COP28) Тараптарынын 28-конференциясында бул сунушту көтөргөн президент Садыр Жапаровдун демилгеси менен уюштурулган.
Эдил Байсалов өз сөзүндө тоо экосистемаларынын климаттын өзгөрүүсүнө өтө аялуулугун баса белгилеп, климаттык чакырыктарды жеңүүдө тоолуу өлкөлөрдүн гана эмес, башка өлкөлөрдүн да күч-аракетин бириктирүү маанилүү экенин белгиледи. Ал ошондой эле Кыргызстандын аталган Диалогду жыл сайын өткөрүлүүчү иш-чара катары консолидациялоо демилгесинин айланасында биригүүгө чакырды.
Бул Диалогдун алдында тоо шериктештигине арналган жана Кыргызстан Андора жана Тоо шериктештигинин катчылыгы менен биргеликте уюштурган, анда катышуучулар тоолорду туруктуу өнүктүрүүнүн маанилүү аспектилерин, климаттын өзгөрүшүнүн тоо тургундарына жана тоо экосистемаларына тийгизген таасиринин көйгөйлөрүн бөлүшүштү.
Бул иш-чаралардын катышуучулары Кыргызстандын тоолуу күн тартибин илгерилетүүдөгү жетекчилигин жогору баалашып, аталган Диалогду БУУнун климаттын өзгөрүшү боюнча алкактык конвенциясынын алкагында жыл сайын өтүүчү иш-чара катары консолидациялоо боюнча кыргыз тараптын сунушун кубатташты.
Бул күнү Эдил Байсалов ошондой эле С.Штил, Г.Вреулс жана Бакуда боло турган тараптардын 29-конференциясынын төрагасы – Азербайжандын экология жана жаратылыш ресурстары министри М.Бабаев менен эки тараптуу жолугушууларды өткөрдү, алар да жогоруда айтылгандарды жылуу кабыл алышып, тоо күн тартиби боюнча демилгелерди айтып, ошондой эле ушул күздө Бакуда өтүүчү COP29да жана башка жогорку деңгээлдеги эл аралык иш-чараларда мүмкүн болгон жардамды көрсөтүүгө даяр экендигин билдирди.
Жашыл климаттык фонддун өкүлдөрү менен энергетика, жашыл экономика, тоолорду туруктуу өнүктүрүү, ошондой эле Кыргызстандын потенциалын жогорулатуу жаатындагы долбоорлорду алдыга жылдыруу маселелери талкууланды.
