Кыргыз-түрк достугу ооруканасын биргелешип башкаруу жөнүндө макулдашуу ратификацияланды

Кыргыз Республикасынын Президенти Садыр Жапаров “2024-жылдын 5-ноябрында Бишкек шаарында кол коюлган Кыргыз Республикасынын Министрлер Кабинети менен Түркия Республикасынын Өкмөтүнүн ортосундагы Реджеп Тайип Эрдоган атындагы Бишкек мамлекеттик кыргыз-түрк достугу ооруканасын биргелешип башкаруу, ошондой эле Кыргыз Республикасынын жарандарынын медицина жана медициналык адистиктер чөйрөсүндө Түркия Республикасында билим алуусу жөнүндө макулдашууну ратификациялоо тууралуу” Кыргыз Республикасынын Мыйзамына кол койду.

Мыйзам 2025-жылдын 12-мартында Кыргыз Республикасынын Жогорку Кеңеши тарабынан кабыл алынган.

Макулдашууда OSYM (Студенттерди тандоо жана ишке орноштуруу борбору) бөлүштүрүлгөндөн кийин Түркия Республикасында жылына 20 дарыгерди медициналык адистештирүү боюнча даярдоону камсыз кылуу, ошондой эле Кыргыз Республикасында дарыгерлерди жана медициналык адистерди даярдоо үчүн окуу программаларын өркүндөтүүнү колдоо каралган.

Макулдашуунун шарттарына ылайык, Оорукананы биргелешип пайдалануу 5 жылга узартылат жана ар бир 5 жылда түрк тарабынан 32 000 000 АКШ доллары өлчөмүндө кошумча бюджет бөлүнөт.