Көл-Суунун жээги таштандылардан тазаланды
Ат-Башы районундагы Көл-Суу жана Көк-Кыя аймактарында тазалык иштери жүргүзүлдү.
Жаратылыш ресурстары, экология жана техникалык көзөмөл министрлигинен билдиришкендей, иш-чарага Экологиялык жана техникалык көзөмөл кызматынын инспекторлору, “Ак-Моюн” муниципалдык ишканасынын кызматкерлери жана туризм тармагында иштеген жарандар катышты.
Тазалоо иштери Көл-Суу көлүнүн жээгинин санитардык абалын жакшыртуу жана жаратылышты таза сактоо максатында уюштурулду.
Белгиленгендей, жергиликтүү тургундардын жана туристтик кызмат көрсөтүүчүлөрдүн катышуусу менен аймактагы таштандылар чогултулду.
“Буга чейин социалдык тармактарда Көл-Суудагы таштандылар тууралуу маалыматтар тараган. Адистердин маалыматына караганда, акыркы күндөрү жааган жаандан улам көлдүн деңгээли көтөрүлүп, таштандылар жээкке сүрүлүп келген”,-деп айтылат маалыматта.
