Гимндин 5 мыкты долбооруна акчалай сыйлык берилет

Бүгүн мамлекеттик гимндин жаңы редакциясынын текстинин жана музыкасынын мыкты долбоорлоруна сынак жарыяланат. Бул тууралуу “Кабар” агенттигине маданият, маалымат, спорт жана жаштар саясаты министринин орун басары Тимурлан Ажымалиев билдирди.

Анын айтымында, сынакка катышууга табыштамаларды кабыл алуу милдети министрликке жүктөлгөн.

“Бүгүн, 7-февралда расмий түрдө биздин ведомство тарабынан республикалык сынак жарыяланат. Сынактык табыштамалардын кагаз жүзүндөгү варианты тиркелген материалдар жана сынактык долбоорлор 20-мартка чейин кабыл алынат”, – деди ал.

Гимндин 5 мыкты долбооруна акчалай сыйлык берилет. Мыкты долбоорлорго 250 миң сомдон 1 млн 500 миң сомго чейинки акчалай сыйлыктар жана дипломдор тапшырылат.

“Гимндин мыкты долбоору үчүн байгелүү орундар аныкталат. 1-орунга 1 млн 500 миң сом, 2-орунга 1 млн сом, 3-орунга 500 миң сом каралган. Атайын байгелер боюнча 2 байгелүү орунду ведомстволор аралык комиссия аныктайт. Анда 4-орунга 250 миң сом 5-орунга 250 миң сом берилет”, – деди ал.

Ошондой эле Тимурлан Ажымалиев белгилегендей, сынак аяктагандан кийин ведомстволор аралык комиссия тарабынан Жогорку Кеңешке гимндин 3 мыкты долбоору жиберилет.

Булак “Кабар” агенттиги