Эми “Түндүк” тиркемесиндеги айдоочулук күбөлүктү Казакстанда колдонууга болот
“Түндүк” электрондук кызмат көрсөтүүлөрдүн мамлекеттик порталы жакында Казакстандын аймагында жеткиликтүү болот. Бул тууралуу түз эфирде президенттин Иш башкармалыгынын башчысынын санариптештирүү боюнча орун басары Алмаз Раимбеков билдирди.
Анын айтымында, “Түндүк” Кыргызстандын жарандары үчүн бардык мамлекеттик документтердин санариптик версиясын электрондук форматта жеткиликтүү кылат.
“Эгер сизди Жол кыймылынын коопсуздугун камсыздоо башкы башкармалыгынын кызматкерлери токтотсо, “Tүндүк” тиркемесиндеги айдоочулук күбөлүгүңүздү көрсөтө аласыз. Ал пластикалык карта сыяктуу эле юридикалык күчкө ээ. Мындан тышкары, биз “Tүндүк” тиркемесин Казакстандын аймагында жайылтуу боюнча сүйлөшүүлөрдү жүргүзүп жатабыз. Жакында жарандар аны Казакстанда да колдоно алышат”, – деп белгиледи Раимбеков.
Ал кошумчалагандай, порталдын географиялык камтуусун кеңейтүү эки өлкөнүн жарандары менен мамлекеттик органдардын ортосундагы өз ара аракеттенүүнү жөнөкөйлөштүрүүгө, ошондой эле Евразия мейкиндигинин алкагында электрондук мамлекеттик кызматтарды өнүктүрүүгө багытталган мамлекеттер аралык санариптик интеграция стратегиясынын бир бөлүгү катары эсептелет.
