Эдил Байсалов Франциянын элчиси Николя Файды кабыл алды

Министрлер кабинетинин төрагасынын орун басары Эдил Байсалов менен Франциянын Кыргызстандагы элчиси Николя Файдын жолугушуусу өттү.

Тараптар кыргыз-француз мамилелеринин жогорку деңгээлин ырасташты жана Франциянын дүйнөдөгү алдыңкы мамлекеттердин бири жана Европа биримдигинин негизги мүчөсү катары маанилүү ролун белгилешти.

Жолугушууда билим берүү, саламаттыкты сактоо, инвестиция, санариптештирүү, айлана-чөйрөнү коргоо жана тоолуу аймактарды туруктуу өнүктүрүү сыяктуу маселелердин кеңири чөйрөсү талкууланды. Кыргызстандын социалдык-экономикалык өнүгүүсүнүн өсүшү жана мамлекеттик башкаруунун ачык-айкындуулугун жогорулатуу жана заманбап технологияларды киргизүү боюнча долбоорлорду илгерилетүүгө эки тараптын кызыгуусу белгиленди.

Эдил Байсалов Франциянын эл аралык уюмдардагы колдоосу жана биргелешкен программалар аркылуу натыйжалуу кызматташуусу үчүн ыраазычылык билдирди.

Элчи Николя Фай эки тараптуу байланыштарды мындан ары да чыңдоого жана гуманитардык жана мамлекеттер аралык өнөктөштүктү кеңейтүүгө даяр экендигин ырастады.