Данияр Амангелдиев Россиянын Свердлов облусунун губернаторунун орун басары менен биргелешкен долбоорлорду талкуулады

Кыргыз Республикасынын Министрлер Кабинетинин Төрагасынын биринчи орун басары Данияр Амангелдиев Кыргыз Республикасына жумушчу сапар менен келген Россия Федерациясынын Свердлов облусунун губернаторунун орун басары Василий Козлов менен жолугушту.

Жолугушуунун жүрүшүндө билим берүү, маданият, инвестиция, энергетика, машина куруу, транспорт, туризм, кайра иштетүү жана жеңил өнөр жайы сыяктуу тармактарда эки тараптуу кызматташуу маселелеринин кеңири спектри козголду.

Өзгөчө көңүл туризм тармагында кызматташууну өнүктүрүүгө, анын ичинде “Екатеринбург-Тамчы” авиарейсин жандандырууга бурулду, ал аймактар ортосундагы туристтик агымды бир кыйла көбөйтөт деп күтүлүүдө. Данияр Амангелдиев Кыргызстан Екатеринбургдагы “жай-2025” көргөзмөсүндө өнөктөш өлкө болууну пландап жатканын белгилеп, уралдыктарга республикадагы санаториялык-курорттук дарылануу жана ден соолукту чыңдоо мүмкүнчүлүктөрүн пайдаланууну сунуштады.

Василий Козлов Свердлов облусунун Кыргыз Республикасы менен өз ара пайдалуу кызматташтыкты кеңейтүүгө кызыкдарлыгын баса белгилеп, региондон Кыргызстандын келечектүү долбоорлоруна инвестицияларды тартуу боюнча ишти активдештирүүгө даярдыгын билдирди.

Тараптар ошондой эле Бишкекте өткөрүлө турган соода-экономикалык кызматташуу боюнча өкмөттөр аралык комиссиянын алдыдагы жыйынынын күн тартибин жана артыкчылыктуу багыттарын талкуулашты.