Чолпон-Ата ШКУнун маданий борбору болмокчу
Кыргызстандын президенти Садыр Жапаров бүгүн Кытай Эл Республикасына болгон жумушчу сапарынын алкагында Тяньцзинь шаарында өткөн Шанхай Кызматташтык Уюмуна (ШКУ) мүчө-мамлекеттердин башчыларынын Кеңешинин 25-жыйынында сөз сүйлөдү.
Президент кыргыз тараптын төрагалыгынын мезгилине ШКУнун туристтик жана маданий борбору катары Ысык-Көлдүн жээгинде жайгашкан Чолпон-Ата шаары бекитилерин белгиледи.
Садыр Жапаров мунун алкагында бир катар иш-чаралар, анын ичинде залкар жазуучу жана ойчул Чыңгыз Айтматовдун демилгеси менен 1986-жылы биринчи жолу өткөн юбилейлик Ысык-Көл “интеллектуалдык” форуму пландаштырылганын кошумчалады.
Мамлекет башчысы ошондой эле ШКУга мүчө-мамлекеттердин маданий-спорттук делегацияларын Кыргызстан 2026-жылдын күзүндө өткөрүүнү пландап жаткан кезектеги Дүйнөлүк көчмөндөр оюндарына катышууга чакырды.
