Бишкекте быйыл 4 жаңы жол пайда болот

Бишкек шаарынын мэри Айбек Джунушалиевдин төрагалыгы алдында шаардык муниципалитеттин жыйындар залында пландуу кеңешме өткөрүлдү.

Жыйындын жүрүшүндө борбор калаанын жол инфраструктурасын жакшыртуу боюнча пландар талкууланды.

Бишкек шаарынын мэриясынын Транспорт жана жол-транспорттук инфратузумдү өнүктүрүү департаментинин директору Улан Бейшенбаев, “Бишкекасфальтсервис” МИнин директорунун орун басары Саламат Кожогулов жана уюштуруу-көзөмөл иштери бөлүмүнүн башчысы Кубандык Акматбеков баяндама жасашты.

Мэр Айбек Джунушалиев подряддык уюмдарды тандоодо аткарылып жаткан иштердин сапатына өзгөчө көңүл бурууну, ошондой эле аныкталган жол кемчиликтерин жоюуну тапшырды.

Белгилей кетсек, 2025-жылы 4 жаңы жол пайда болот. Сухэ-Батор көчөсүн 7-апрель көчөсүнөн Ауэзов көчөсүнө чейин (4,5 км), Ауэзов көчөсүн Сухэ-Батор көчөсүнөн Анкара көчөсүнө чейин (3,1 км), Ахунбаев көчөсүн Достоевский көчөсүнөн Аузов көчөсүнө чейин (3,5 км), Токтоналиев көчөсүн Түштүк магистраль көчөсүнөн Абдрахманов көчөсүнө чейин (1,3 км) куруу пландалууда.

Ушул жылдын аягына чейин Бакаев көчөсүн Лев Толстой көчөсүнөн Бөкөнбаев көчөсүнө чейин, ошондой эле Кара-Дарыя көчөсүн Горький көчөсүнөн Л. Толстой көчөсүнө чейин ачуу пландаштырылууда.

Ошондой эле төмөнкү аймактарда жолдорду реконструкциялоо иштери жүргүзүлөт:
– Шабдан Баатыр көчөсүндө Курманжан Датка көчөсүнөн Лермонтов көчөсүнө чейин;
– Ахунбаев көчөсүндө 7-апрель көчөсүнөн Жукеев-Пудовкин көчөсүнө чейин;
– Жибек-Жолу проспектиси менен Курманжан Датка көчөсүнөн Лермонтов көчөсүнө чейин;
– Жаш Гвардия бульварында Жибек-Жолу проспектисинен Бөкөнбаев көчөсүнө чейин;
– Л.Толстой көчөсүндө Ибраимов көчөсүнөн Калык-Акиев көчөсүнө чейин;
– Москва көчөсүндө Жаш Гвардия бульварынан Фучик көчөсүнө чейин;
– Медеров көчөсүндө Панфилов көчөсүнөн 7-апрель көчөсүнө чейин;
– Курманжан Датка көчөсүндө Жибек Жолу проспектисинен Чүй проспектисине чейин.

Жаңы көпүрөлөрдүн курулушу М.Ауэзов көчөсүндө Бишкек ЖЭБ каналы аркылуу, Жибек-Жолу проспектисинде Аламүдүн дарыясы аркылуу, Шүкүров көчөсүндө ВБЧК аркылуу Медеров көчөсүнө чейин курулат.

Мындан тышкары, борбордо эстакадалык көпүрөлөрдү жана транспорттук түйүндөрдү куруу иштерин баштоо пландаштырылууда.

Жыйындын соңунда борбор калаанын башчысы жол инфраструктурасын жакшыртуу маселелерин чечүүдө комплекстүү мамилени колдонуу милдети коюлду.