Бишкекте алгачкы ротордук унаа токтотуучу жай ишке кирди
Бишкек шаарындагы Орто-Сай базарынын аймагындагы Безымянная көчөсүндө жайгашкан биринчи ротордук унаа токтотуучу жай пайдаланууга берилди.
Мэриядан билдиришкендей, бул инновациялык чечим шаардын мейкиндигин натыйжалуу пайдаланууга жана тыгыз курулуш шартында унаа токтотуучу жайлардын санын көбөйтүүгө мүмкүндүк берет.
Белгилей кетсек, жаңы ротордук унаа токтотуучу жай 10 унаага ылайыкталган. Унаа токтотуунун баасы биринчи саатына 25 сом, андан кийинки ар бир саатына өзүнчө 25 сомдон алынат. Төлөм QR-код аркылуу жүргүзүлөт, андан кийин айдоочу операторго чекти көрсөтүп, унаасын токтотуучу жайдан чыгаруу үчүн кайрылат.
Ротордук унаа токтотуучу жайды орнотуу – бул шаардын инфратүзүмүн модернизациялоого жана Бишкектин борбордук райондорунда унаа токтотуучу жайлардын жетишсиздигин чечүүгө карай жасалган кадам. Эгер долбоор ийгиликтүү ишке ашса, мындай унаа токтотуучу жайларды борбордун башка жерлерине да орнотууга болот.
