Бишкек — Нарын — Торугарт трассасынын бир бөлүгү 6 тилкелүү болуп кеңейтилип, акы төлөнүүчү жол болору пландалууда

Бишкек – Балыкчы – Нарын – Торугарт унаа жолунун бир бөлүгүн мамлекеттик-жеке өнөктөштүктүн негизинде оңдоп-түзөп, акы төлөнүүчү жол кылуу пландалууда.

Транспорт министрлигинен билдиришкендей, план боюнча аталган жолдун 30,6 чакырымдан 90-чакырымга чейинки бөлүгү жаңыланып, 6 тилкелүү болот. Аны куруу үчүн министрлик инвесторлорду издөөдө. Жол реконструкциядан өткөндөн кийин акы төлөнүүчү болот. Ага альтернативдүү жол катары ички Бишкек – Нарын – Торугарт жолу кызмат кылары кабарланды.

“Дүйнөнүн өнүккөн өлкөлөрүндө акы төлөнүүчү жана бекер жолдор аркылуу каттамдарды тандоо барган сайын көбөйүүдө. Жолдун өзүн-өзү камсыздоосу маанилүү артыкчылыктардын бири болуп саналат. Бул ыкма жолду курууга жана күтүүгө кеткен чыгымдарды жабуу үчүн киргизилүүдө. Жол көздөгөн жериңизге тезирээк жетүүгө мүмкүндүк түзөт”, — деп айтылат маалыматта.

Инвесторлор төмөнкү даректерге кайрылса болот: Бишкек шаары, Н. Исанов көчөсү 42

Байланыш номерлер: 0 (312) 31 43 13; 0 (312) 31 42 91

Почта: mtdgovkg@mail.ru