“Бир айыл — бир продукт” улуттук долбооруна катышкан өндүрүүчүлөрдүн саны 3 миңге жетти
“Бир айыл — бир продукт” улуттук долбооруна катышкан өндүрүүчүлөрдүн саны 3 миңге жетти. Бул тууралуу “Биринчи радионун” түз эфиринде “Бир айыл — бир продукт”коомунун өкүлү Сайкал Сүйүнбекова билдирди.
Анын айтымында, аталган долбоордун алкагында ар кандай продукциянын түрү иштелип, алардын айрымдары аймактык брендге ээ болду.
“Бир айыл – бир продукт” долбоору 2007-жылдан бери Экономика жана коммерция министрлиги менен Япониянын Эл аралык кызматташтык агенттиги (JICA) тарабынан ишке ашырылып келет. Учурда долбоордун үчүнчү фазасы ишке ашырылып, ар кандай продукциянын түрү жасалды. Алгач ири долбоор Ысык-Көл облусунан башталып, Талас, Нарын облустарын камтыган. Алдыда республиканын бардык аймагында жүзөгө ашыруу пландары бар. Анда экологиялык таза азыктар, кол өнөрчүлөрдүн эмгектери иштелип чыгып, эл аралык стандарттагы укук менен сатыкка чыгат. Мындай кадам элеттеги ишкердикти көтөрүп, жумушсуздукту жоюп, айылдын өнүгүшүнө салым кошот”,-деди ал.
Ал кошумчалагандай, долбоордун алкагында өндүрүлгөн продуктуларды саткан дүкөндөр Бишкек, Каракол, Ош шаарларында иштеп жатат, эми башка аймактарда да ачуу каралууда.
Эске салсак, 2023-жылдын 20-февралында президент Садыр Жапаров “Бир айыл — бир продукт” улуттук экономикалык долбоору жөнүндөгү” жарлыкка кол коюп, ал жергиликтүү ресурстардан сапаттуу продукция өндүрүү, аймактарды өнүктүрүүгө багытталган.
