Бейтаптын санариптик амбулатордук картасын» пилоттук режимде киргизүү башталды
Кыргыз Республикасынын Саламаттык сактоо министрлиги Санариптик саламаттык сактоону өнүктүрүүнүн максаттуу моделин ишке ашыруунун алкагында «Бейтаптын санариптик амбулатордук картасын» пилоттук режимде ишке киргизүүнү баштады.
«Бейтаптын санариптик амбулатордук картасы» – бул бейтаптардын медициналык маалыматтарын сактаган жана башкарган маалымат системасы, медициналык кызматкерлерге онлайн режиминде кирүү мүмкүнчүлүгүн берет.
Системаны иштеп чыгуунун максаты бейтаптардын ден соолугу жөнүндө маалыматка ыкчам жана ыңгайлуу жетүүнү камсыз кылуу аркылуу калкка медициналык жардам көрсөтүүнүн натыйжалуулугун жогорулатуу, ошондой эле медициналык кызматкерге маалыматты издөөгө жана чогултууга сарпталган бюрократиялык жүктү азайтуу болуп саналат.
Система бейтаптардын медициналык тарыхын санариптик жазууну, маалыматтарды борборлоштурулган сактоону, лабораториялык жана диагностикалык системалар менен интеграциялоону, дарыгерлердин кабыл алуу графигин камтыйт. Система медициналык персоналдын ишин жеңилдетүүгө багытталган жана оорунун статистикасын жана ресурстарды пландаштыруу үчүн отчетторду жана аналитиканы түзүүгө мүмкүндүк берет.
Мындан тышкары, «Бейтаптын санариптик амбулатордук картасын» «Адамдын ден соолугунун санариптик профили» менен интеграциялоо боюнча иштер жүргүзүлүүдө, бул калкка өзүнүн жеке медициналык маалыматтарын бир жерден алууга мүмкүндүк берет. Ошентип, бейтаптар медициналык тарыхына, лабораториялык анализдердин натыйжаларына жана диагностикалык текшерүүлөргө оңой жете алышат. Бул системалардын интеграциясы ден соолугуңузду көзөмөлдөө жана сактоо үчүн зарыл болгон маалыматты ыңгайлуураак жана толук жеткирүүгө мүмкүндүк берет.
Ошондой эле, аларды алмаштыруучу санариптик чечимдер болгон учурда медициналык документтерди кагаз түрүндө жүргүзүүнү жокко чыгарган электрондук медициналык документ жүгүртүү тартиби иштелип чыкты. Бул кадам санариптик чечимдерди активдүү ишке киргизүүгө, маалыматтын кайталанышын азайтууга, финансыны үнөмдөөгө жана аларды санариптик инфраструктураны өнүктүрүүгө багыттоого мүмкүндүк берет.
Эскерте кетсек, бул Кыргыз Республикасынын Саламаттык сактоо министрлиги тарабынан 2023-жылы иштелип чыккан бирдиктүү санариптик схеманын алкагында ишке ашырылган үчүнчү санариптик чечим.
