Бакыт Төрөбаев: Биздин милдет – дыйкандарды заманбап техникалар менен камсыздоо
Биздин милдет – дыйкан-фермерлерге санариптик куралдарга, заманбап инновациялык технологияларга жеткиликтүүлүктү камсыз кылуу, – деди министрлер кабинетинин төрагасынын орун басары – суу ресурстары, айыл чарба жана кайра иштетүү өнөр жайы министри Бакыт Төрөбаев Бишкекте өтүп жаткан “Санарип дыйкан – 2025” форумунун жүрүшүндө.
Анын айтымында, министрлик бул технологиялардын ар бир дыйкан үчүн жеткиликтүү жана түшүнүктүү болушуна өзгөчө көңүл бурат.
“Биздин милдет – дыйкан-фермерлер санариптик куралдарды күнүмдүк ишинде натыйжалуу колдоно ала турган шарттарды түзүү. Бул деген маалымат берүү жана окутуу, ыңгайлуу онлайн кызматтарды киргизүү, заманбап инфраструктурга, инновациялык технологияларга жеткиликтүүлүктү камсыз кылуу”, – деп билдирди өз сөзүндө министр Төрөбаев.
Иш-чарада дыйкан-фермерлер көргөзмөдө айыл чарбасындагы санариптик революциянын бир бөлүгү болгон алдыңкы технологиялар менен таанышып, аны колдонуунун жана кандай жол аркылуу сатып алып пайдаланса болоору тууралуу кеңири маалымат алышты.
Белгилей кетсек, бүгүн Бишкек шаарындагы Токтоболот Абдумомунов атындагы Кыргыз улуттук академиялык драма театрында алгачкы ирет агроөнөр жай сектору үчүн маанилүү окуя – “Санарип дыйкан 2025” форуму өтүп жатат. Иш-чаранын алкагында айыл чарбасынын заманбап технологияларынын демонстрациялык көргөзмөсү өтүүдө. Форум эртең, 4-апрелде дагы уланат.
