Муратбек Азымбакиев Нью-Йоркто бир катар жолугушууларды өткөрүп, жогорку деңгээлдеги отурумга катышты
Президенттин администрациясынын тышкы саясат бөлүмүнүн башчысы Муратбек Азымбакиев Нью-Йоркто БУУнун Башкы Ассамблеясынын 79-сессиясынын талаасында БУУнун жана чет мамлекеттердин жогорку даражалуу өкүлдөрү менен бир катар жолугушууларды өткөрдү жана жасалма интеллекттин потенциалын өнүктүрүү жаатында эл аралык кызматташуу боюнча жогорку деңгээлдеги отурумга катышты.
Иш-чаралардын алкагында Муратбек Азымбакиев БУУнун башкы катчысынын орун басары, терроризмге каршы башкармалыктын башчысы Владимир Воронков менен жолугушту.
Жолугушууда Кыргызстан менен БУУнун ортосундагы терроризм жана зордук-зомбулук экстремизмге каршы күрөштө өнөктөштүктү бекемдөө маселелери талкууланды. Ошондой эле эл аралык коопсуздуктун негизги маселелери жана террористтик коркунучтарга биргелешип каршы туруу боюнча пикир алмашуу болду.
Мындан тышкары, Муратбек Азымбакиев Лаос Элдик Демократиялык Республикасынын премьер-министринин орун басары жана тышкы иштер министри Салеумхай Коммасит менен жолугушту.
Анын жүрүшүндө президенттин администрациянын тышкы саясат бөлүмүнүн башчысы 2027-2028-жылдарга БУУнун Коопсуздук Кеңешинин туруктуу эмес мүчөлүгүнө Кыргызстандын талапкерлигин көрсөтүү жөнүндө, ага шайланган учурда БУУнун Коопсуздук Кеңешиндеги өлкөнүн пландары жана артыкчылыктары тууралуу маалымат берди жана маектешине Кыргызстандын президенти Садыр Жапаровдун алдыдагы шайлоодо Кыргызстандын талапкерлигин колдоо боюнча өтүнүчүн-катын жеткирди.
Муратбек Азымбакиев Тувалунун юстиция, коммуникация жана тышкы иштер министри Паулсон Панапа менен да жолугуп, Кыргызстандын талапкерлигин колдоо боюнча ушундай эле өтүнүч-катты тапшырды.
Муратбек Азымбакиев дипломаттар менен болгон жолугушуулардан тышкары Кытай Эл Республикасы жана Замбия Республикасы тарабынан уюштурулган жасалма интеллектти өнүктүрүү боюнча эл аралык кызматташтык боюнча жогорку деңгээлдеги отурумга катышты.
БУУнун Башкы Ассамблеясынын 79-сессиясында өткөн бул отурум технологияларды өнүктүрүү жана аларды Глобалдык Түштүк өлкөлөрүнүн, анын ичинде Кыргызстандын кызыкчылыктарында колдонуу перспективаларын талкуулоо үчүн маанилүү аянтча болуп калды.
Отурумдун тематикасы санариптик ажырымды жоюуга жана бардыгы үчүн алдыңкы технологияларга бирдей жеткиликтүүлүктү камсыз кылууга багытталган президент Садыр Жапаровдун демилгелерине ылайык келет.
