Аскат Алагөзов: Криптовалюта төлөм каражаты катары дүйнөдө кеңири колдонулууда
Криптовалюта төлөм каражаты катары дүйнөдө кеңири колдонулууда. Бул тууралуу президенттин басма сөз катчысы Аскат Алагөзов социалдык тармактагы баракчасы аркылуу билдирди.
Анын айтымында, санариптик валюта чөйрөсү, аны менен бирге каржы рыногу да өзгөрүп турат. Учурда криптовалюта – бул ар кайсы өлкөлөрдө суроо-талап ар кандай болгон заманбап төлөм ыкмасы. Bitcointreasuries кызматынын маалыматы боюнча, мамлекеттердин жалпы крипторезервдери болжол менен 560,7 миң ВТС ($32,2 миллиарддан ашык) деп бааланат.
“Bitcointreasuries тизмесине Украина жана Кытай кирет — бул өлкөлөрдүн үлүшүнө 236 миңден ашык ($13,5 млрд) туура келген. Рейтинг түзүүчүлөр Украинада 46,351 миң ВТС деп санашат, бирок, албетте, бул мамлекеттин эмес, жеке адамдар катары мамлекеттик кызматкерлердин мүлкү. Канткен менен мындай биткоиндердин саны – 46 миң 351 – мурда Украинанын мамлекеттик кызматкерлеринин декларацияларында көрсөтүлгөн.
Кытай Bitcointreasuries тизмесинде экинчи орунда турат, анын запастары 190 миң ВТС деп бааланат. Tether компаниясы (USDT эмитенти) жылдын биринчи жарым жылдыгынын жыйынтыгы боюнча $5,2 млрд өлчөмүндө рекорддук киреше жөнүндө отчет берди. Tether`дин АКШ облигацияларындагы резерви дээрлик 100 миллиард долларды түздү. Бул Германия, БАЭ же Австралияга караганда көбүрөөк. Компания айына миллиард доллар киреше табат”, – деди ал.
Аскат Алагөзов белгилегендей, бүгүнкү күндө криптовалютаны айрым өлкөлөр расмий төлөм каражаты катары кабыл алышса, башкалары аларды колдонуу жана өнүктүрүү үчүн жагымдуу шарттарды түзүшүүдө. Биткоин жана башка криптовалютаны колдонгон эң популярдуу өлкөлөрдүн катарына АКШ, Канада, Улуу Британия, Япония жана Түштүк Корея кирет. Бирок көпчүлүк криптовалюталар борбордон ажыратылгандыктан жана өкмөт тарабынан жөнгө салынбагандыктан Алжир, Египет, Ирак, Непал жана Катар сыяктуу кээ бир өлкөлөрдө аларды колдонууга тыюу салынган.
“Криптовалютаны эң көп колдонгон бир нече өлкөлөр бар жана алардын эң чоңу АКШ, Япония, Улуу Британия, Түштүк Корея жана Канада. Өкмөттөрдүн криптовалюталарды толук кандуу төлөм каражаты катары кабыл алышы менен, алардын жашоочулары үчүн көптөгөн мүмкүнчүлүктөр ачылат. Колдонуучулар криптовалютаны өз муктаждыктары үчүн көбүрөөк коопсуздук жана ишенимдүүлүк менен колдоно алышат. Ошондой эле аз комиссияларды жана кыйла тез транзакцияларды камсыз кылган криптобиржалардын жана шлюздардын олуттуу саны бар. Бул криптовалюта өзгөчөлүктөрү адамдар үчүн абдан жагымдуу, анткени алар акча которууга жана төлөмдөрдү тез, арзан жана туруктуу валютада кабыл алууга мүмкүндүк берет. Кээ бир криптовалюта провайдерлери анонимдүүлүктү сунушташат, бул купуялуулукка артыкчылык берген жана санариптик активдеринин коопсуздугун сактоону каалагандар үчүн жагымдуу кылган көптөгөн колдонуучулар үчүн пайдалуу өзгөчөлүктөрдүн бири. Мында банктык сыр сыяктуу эле мамлекет терроризмди (экстремизмди) каржылоого жана кылмыш жолу менен алынган кирешелерди легализациялоого (адалдоого), ошондой эле шектүү операциялардын белгилерин камтыган операциялардын ишке ашырылышына каршы аракеттенүү жана салык салуу боюнча мыйзамдарды сактоо максатында криптовалюталардын капчыктары боюнча маалыматтарды ачуу боюнча криптовалюта провайдерлерине карата талаптарды белгилей алат”, – деп кошумчалады Алагөзов.
Ошондой эле ал көпчүлүк адамдар криптовалюталарды инвестициялоодон акча табуу мүмкүнчүлүгү катары карашарын айтты. Көптөгөн акча которуулар атайын функцияларды камтыган Bitcoin банкоматтар аркылуу жүргүзүлөт. Учурда бул функция 100дөн ашык өлкөдө жана 35 валютада иштейт.
Дүйнө жүзүндө Bitcoin банкоматтарынын саны боюнча статистика жыл сайын туруктуу өсүштү көрсөтүүдө. Coinatmradar маалыматына ылайык, 2016-жылдын январында 501 гана болсо, 2017-жылдын январына карата алардын саны 965ке жеткен. 2018-жылдын январында алардын саны эки эседен ашык көбөйүп, 2 073кө жетти, ал эми 2019-жылдын январына карата дээрлик эки эсеге көбөйүп, 4 112ге жеткен.
