Акылбек Жапаров: КМШда кызматташтыктын негизги көрсөткүчү өлкөлөрдүн социалдык-экономикалык абалын жакшыртуу болуп саналат

Көз карандысыз Мамлекеттер Шериктештигинин мейкиндигинде кызматташуунун натыйжалуулугунун негизги көрсөткүчтөрү биздин өлкөлөрдүн социалдык-экономикалык абалын жакшыртуу жана калктын бакубаттуулугун жогорулатуу болуп саналат. Бул тууралуу Россиянын Москва шаарында өткөрүлгөн КМШга мүчө мамлекеттердин өкмөт башчыларынын кеңешинин жыйынында сүйлөгөн сөзүндө министрлер кабинетинин төрагасы Акылбек Жапаров билдирди.

Минкаб төрагасы соода-экономикалык, илимий-техникалык жана маданий-гуманитардык кызматташтыктын прогрессивдүү өнүгүп жатканын, ошондой эле КМШ мейкиндигинде энергетика, өнөр жай, транспорт инфраструктурасында, билим берүү, илим, маданият жана башка тармактарда келечектүү биргелешкен долбоорлорду илгерилетүү үчүн жагымдуу шарттар түзүлүп жатканын белгиледи.

“Интеграция процесстери байкаларлык тереңдеп баратат, катышуучу-мамлекеттердин саясий, экономикалык жана маданий-гуманитардык чөйрөлөрдө өз ара аракеттенүүсү чыңдалууда, КМШнын жана башка интеграциялык бирикмелердин ишмердүүлүгүнүн интеграциясы уланууда, Шериктештиктин эл аралык аренадагы бедели жогорулап жатат. КМШ өлкөлөрүнүн жалпы ИДПсынын 4,2%га өсүүсү мунун айкын далили болуп саналат, бул дүйнөлүк ИДПдагы орточо статистикалык көрсөткүчтөн ашат. Мына ушул контекстте мен өлкөбүздүн экономикалык абалы жөнүндөгү акыркы маалыматтар менен бөлүшөйүн. Биздин статистикалык маалыматтарга ылайык, 2024-жылдын январь-ноябрь айларында ИДПнын реалдуу өсүү темпи 109% түздү. Бул мезгилде биз өнүгүү темпин сактап гана тим болбостон, аны тездетип, макроэкономикалык туруктуулукту чыңдап, келечектеги өсүш үчүн бекем пайдубал түздүк”, – деген Акылбек Жапаров, экономика, чет өлкөлүк инвестицияларды тартууну улантуу жана өлкөнүн стратегиялык маанилүү тармактарына ийгиликтүү интеграциялоону камсыз кылуу өлкөнүн бүгүнкү негизги максаты экендигин кошумчалады.

Акылбек Жапаров Евразия өнүктүрүү банкынын акыркы божомолдору боюнча Кыргызстандын ИДПсынын 2025-жылга карата өсүүсү 8,7%дан ашык болорун кошумчалады. Кыргыз Республикасынын Шериктештиктин өлкөлөрү менен өз ара соодасында оң динамика байкалууда. Кыргызстандын КМШга мүчө мамлекеттер менен тышкы соода жүгүртүүсү 2024-жылдын январь-сентябрь айларында өткөн жылга салыштырмалуу 15,1%га өстү.

“Өткөн жылы кол коюлган жана КМШнын бир катар өлкөлөрү үчүн быйыл күчүнө кирген Кызмат көрсөтүүлөрдү, ишканаларды, иш-чараларды жана инвестицияларды эркин соодалоо жөнүндө макулдашуу соода-экономикалык мамилелерди өнүктүрүүдө оң роль ойнойт деп ишенем. Жалпысынан өткөн жылдарда КМШга мүчө мамлекеттер соода, энергетика, транспорт, айыл чарба, курулуш, өнөр жай кооперациясы, туризм жана башка тармактарда бекем өз ара пайдалуу байланыштарды түзүп, экономикалык өз ара аракеттенүүнүн көптөгөн тармактарында чоң ийгиликтерге жетишти”, – деди ал.

Министрлер кабинетинин төрагасы Шериктештиктин мейкиндигинде жана жалпысынан Евразия континентинде байланышты чыңдоонун негизи болуп саналган транспорт-логистикалык секторду өнүктүрүүгө көбүрөөк көңүл бурулуп жатканын улантты.

Анын пикиринде, энергетика тармагында 2035-жылга чейинки мөөнөткө кызматташуу Концепциясы жана аны ишке ашыруу боюнча артыкчылыктуу аракеттердин планы, ошондой эле 2030-жылга чейин инфраструктураны оптималдаштыруу жана эл аралык транспортту өнүктүрүү боюнча иш-чаралар планы сыяктуу документтерди кабыл алуу болуп, бул маанилүү багыттарда кызматташтыкты өнүктүрүүгө өз убагында кошумча түрткү берүүдө. Ал ошондой эле Россиянын КМШнын Экономикалык кеңешинин жыйындарын Шериктештиктин ар кайсы шаарларында өткөрүү демилгесин колдой турганын билдирди.

Акылбек Жапаров өз сөзүндө эмгек миграциясы жаатында кызматташууну активдештирип, жумушчулардын эркин жүрүү маселеси алдыңкы планга чыгып жатканын эске алып, бул багыттагы ченемдик укуктук базаны жаңыртууга чакырды.

“Эмгек миграциясы коопсуз, тартиптүү жана мыйзамдуу болушу үчүн, ал эми чынчыл жана мыйзамды сыйлаган эмгекчилер адилетсиздикке, бир жактуулукка жана дискриминацияга дуушар болбошу үчүн инсандык текшерүүнүн механизмдерин иштеп чыгуу үчүн күчтөрдү бириктирүү зарыл деп эсептейм. Ушуга байланыштуу биздин элдерибиздин ортосундагы достукту жана өз ара түшүнүшүүнү чыңдоо, эмгекчилердин укуктарын толук ишке ашырууга багытталган өз ара алгылыктуу чечимдерди табуу боюнча жалпы ишти улантуу маанилүү деп эсептейм”, – деп баса белгиледи Акылбек Жапаров.

Министрлер кабинетинин төрагасы ошондой эле маданий-гуманитардык чөйрөдөгү кызматташтыкты өнүктүрүү Шериктештикте артыкчылыктуу багыт болуп келгенин жана ал уланаарын кошумчалады.