Адылбек Касымалиев жана Кохир Расулзода кеңейтилген сүйлөшүүлөрдү өткөрүштү

Тажикстандын борборунда Кыргызстандын министрлер кабинетинин төрагасы Адылбек Касымалиевдин Тажикстандын премьер-министри Кохир Расулзода менен эки тараптуу өз ара аракеттенүүнүн негизги маселелерине арналган кеңейтилген жолугушуусу болуп өттү.

Талкуунун негизги маселелеринин бири – Тажикстандын Худжанд шаарында пландаштырылган Кыргызстан, Тажикстан жана Өзбекстандын президенттеринин үч тараптуу жолугушуусуна даярдык көрүү болду.

Өкмөт башчыларынын сүйлөшүүлөрүнүн негизги багыты Кыргызстан менен Тажикстандын ортосундагы соода-экономикалык байланыштарды калыбына келтирүү жана андан ары өнүктүрүү болду. Адылбек Касымалиев Кыргызстандын министрлер кабинетинин Тажикстан өкмөтү менен эки тараптуу мамилелерди тереңдетүү жана экономикалык кызматташтыкты кеңейтүү үчүн биргелешкен активдүү ишти улантууга чечкиндүүлүгүн баса белгиледи.

“Кыргызстандын министрлер кабинетинин эки тараптуу мамилелерди жана экономикалык кызматташтыкты мындан ары өнүктүрүү үчүн Тажикстан өкмөтү менен биргелешкен ишти улантууга бекем ниетин баса белгилегим келет”, – деди минкаб башчысы.

Бул багытта кызматташтыкты активдештирүү үчүн тараптар эки өлкөнүн өкмөт башчыларынын төрагалыгы алдында Өкмөттөр аралык кеңешти уюштуруу мүмкүнчүлүгүн талкуулашты. Ошондой эле маданий-гуманитардык кызматташууну мындан ары өнүктүрүүнүн, анын ичинде Кыргызстан жана Тажикстан элдеринин чыгармачылык мурастарын колдоонун жана жайылтуунун маанилүүлүгүнө өзгөчө көңүл бурулду.

Энергетикалык кызматташтыктын келечегин карап чыгып, тараптар “CASA-1000” стратегиялык долбоорун ишке ашыруунун маанилүүлүгүн белгилешти, ал, жалпы пикирге ылайык, эки өлкөнүн энергосистемаларын бириктирип, региондо электр энергиясын экспорттоо үчүн жаңы мүмкүнчүлүктөрдү түзүүгө мүмкүндүк берет. Ошондой эле өнөр жай кооперациясын өнүктүрүү, өлкөлөр ортосундагы үзгүлтүксүз авиациялык жана транспорттук каттамдарды жандандыруу маселелери козголду.

Өкмөт башчылары эл аралык демилгелерди, анын ичинде БУУнун Коопсуздук кеңешинин туруктуу эмес мүчөлүгүнө талапкерлерди илгерилетүү жана Кыргызстандын 2022-жылды “Тоолуу аймактарды туруктуу өнүктүрүүнүн эл аралык жылы” деп жарыялоо боюнча демилгелерин өз ара колдоонун ийгиликтүү тажрыйбасын белгилешти.

Өз кезегинде Тажикстандын премьер-министри Кохир Расулзода кыргыз-тажик өз ара аракеттенүүсүн принципиалдуу жаңы деңгээлге чыгаруу үчүн олуттуу потенциал бар экендигин баса белгилеп, тар форматтагы жолугушуунун жүрүшүндө болуп өткөн эки тараптуу күн тартибинин актуалдуу маселелери боюнча жемиштүү пикир алмашууну айтып өттү.

Жолугушуунун соңунда тараптар жолугушуунун жыйынтыктары өнөктөштүк мамилелерди мындан ары чыңдоого жана Кыргызстан менен Тажикстандын ортосундагы өз ара кызыкчылык туудурган бардык чөйрөлөрдө кызматташууну кеңейтүүгө өбөлгө болот деген ишенимин билдиришти.