Адылбек Касымалиев Ханой шаарында Вьетнамдын бизнес-коомчулугу менен жолугушту

Министрлер Кабинетинин Төрагасы-Кыргыз Республикасынын Президентинин Администрациясынын Жетекчиси Адылбек Касымалиев Вьетнам Социалисттик Республикасына расмий визитинин алкагында Ханой шаарында Вьетнамдын бизнес-коомчулугу менен жолугушууга катышты.

Иш-чарага ар кандай тармактарда иштеген ишкер чөйрөлөрдүн 70ке жакын өкүлү катышты.  Жолугушуунун жүрүшүндө Кыргызстан менен Вьетнамдын ортосундагы соода-экономикалык кызматташтыкты кеңейтүүнүн перспективалары, инвестицияларды тартуу, ошондой эле экономиканын ар кыл тармактарындагы биргелешкен долбоорлор талкууланды.

МинКаб башчысы кыргыз тараптын Вьетнам менен экономикалык байланыштарды тереңдетүүгө кызыкдарлыгын баса белгилеп, Кыргызстанда бизнес жүргүзүү жана инвестициялык ишмердүүлүк үчүн жагымдуу шарттарды белгиледи.

Адылбек Касымалиев белгилегендей, акыркы 4 жылда Кыргыз Республикасынын Президенти Садыр Жапаровдун жетекчилиги астында жүргүзүлгөн көп пландуу реформанын натыйжасында Кыргызстандын экономикалык өсүшү туруктуу жана ырааттуу өнүгүүнү көрсөтүүдө. Мунун көрсөткүчү болуп ИДПнын жылдык орточо өсүш темпи 9% түзөт.

“Кыргызстан чет өлкөлүк инвесторлор үчүн салык преференциялары, бизнес жүргүзүүнүн жөнөкөйлөтүлгөн жол-жоболору жана инвесторлордун укуктарын мыйзам деңгээлинде коргоо сыяктуу бир катар жеңилдиктерди сунуштайт. Бул чаралардын бардыгы биргелешкен долбоорлорго кызыкдар Вьетнамдын ишкер чөйрөлөрү үчүн кеңири мүмкүнчүлүктөрдү ачат. Биздин өлкөлөр өз ара пайдалуу мамилелерди өнүктүрүүгө багытталган демилгелерди жана долбоорлорду ишке ашыруу үчүн олуттуу потенциалга ээ”, – деди ал.

Министрлер Кабинетинин башчысы айыл чарба жана айыл чарба продукциясын кайра иштетүү, энергетика, анын ичинде гидроэнергетика жана энергиянын кайра жаралуучу булактары, туризм жана туристтик кластерлерди түзүү, маалыматтык технологиялар жана санариптик тармактарда Кыргыз-Вьетнам өнөктөштүгүн кеңейтүү үчүн чоң потенциалды белгиледи.

Бизнес диалогдун жүрүшүндө Кыргыз Республикасынын инвестициялык мүмкүнчүлүктөрү жөнүндө Кыргыз Республикасынын Президентине караштуу Инвестициялар боюнча Улуттук агенттиктин директору Таалайбек Иманов, өлкөнүн энергетикалык потенциалы жана негизги энергетикалык долбоорлор жөнүндө Энергетика министри Таалайбек Ибраев баяндама жасады.

Вьетнамдык ишкерлер өз кезегинде активдүү кызматташууга даяр экендиктерин билдиришти.

Жолугушуунун жыйынтыгында тараптар диалогду улантууну жана эки тараптуу өнөктөштүктү бекемдөөгө багытталган конкреттүү демилгелерди кароону макулдашышты.

Ишкер жолугушуунун алкагында өз ара түшүнүшүү жөнүндө документтерге кол коюп, алмашуу аземи болду. Атап айтканда, кол коюлган документтер:

– Кыргыз Республикасынын Энергетика министрлиги менен Вьетнамдын өнөр жай жана соода министрлигинин ортосундагы өз ара түшүнүшүү жөнүндө Меморандум;

– Кыргыз Республикасынын Энергетика министрлиги менен Vtech компаниясынын (Вьетнам)ортосундагы өз ара түшүнүшүү жөнүндө Меморандум;

– “Кыргызстандын улуттук электр тармагы” ААК менен Вьетнамдын электр энергетика системасынын жана рыногунун улуттук операторунун ортосундагы өз ара түшүнүшүү жөнүндө Меморандум.