Бүгүн Ош шаарынан ажылык сапарга алгачкы топ жөнөп кетет
Ош шаарынын мэри Бакытбек Жетигенов Кыргызстан мусулмандарынын Азирети Муфтийи Абдулазиз кары Закиров, Ош шаарынын казысы Мирланбек ажы Токтомушев башында турган Ош шаардык казыятынын өкүлдөрү менен жолугушту.
Анын алкагында Ош шаарынын диний чөйрөсүндө жасалып жаткан иштер боюнча пикир алышты.
Абдулазиз кары Закиров диний багытта ар тараптуу колдоо көрсөтүлүп жаткандыгы үчүн, шаар бийлигине ыраазычылыгын билдирди.
Шаар башчысы Бакытбек Жетигенов Ош шаарынын мэриясы мындан ары дагы ар тараптуу колдоо көрсөтүлөрүн белгилеп, ажылык сапарга аттанган шаар тургундарын коштоп баруучу ажы башчыларга ак жол каалады.
Белгилей кетсек, бүгүн 30-май күнү ажылык сапарга өлкө аймагы боюнча Ош шаарынан алгачкы топ сапар тартат. Жалпы Кыргызстан боюнча 6080, ал эми Ош шаары боюнча 600гө жакын адам ажылык зыяратка жолдомо алышкан.
