Ижарачылардан мыйзамсыз акча чогултуп жүргөн “Уста” базарынын коммерциялык директорун кармады

“Уста” базарындагы мыйзамсыз акча каражаттарын чогултуу боюнча фактылар аныкталды, деп билдирет Улуттук коопсуздук боюнча мамлекеттик комитеттин (УКМК) басма сөз кызматы.

Маалыматка ылайык, атайын кызмат тарабынан “Уста” курулуш материалдары базарындагы чарба жүргүзүүчү субъекттерге ылайыктуу шарттарды түзүүнүн алкагында, ижарачылардан ижара келишиминде каралбаган акча каражаттарын мыйзамсыз чогултуу, ошондой эле өзгөчө ири өлчөмдө салык төлөөдөн качуу фактылары аныкталды.

Бул факты боюнча кылмыш иши козголуп, анын алкагында ар бир ижарачыдан ай сайын мыйзамсыз түрдө 5 миң сомдон 50 миң сомго чейин акча каражатын чогултуп жүргөн базардын коммерциялык директору кармалды.

Мындан тышкары, ижара төлөмдөрүн 30% кыскартуу боюнча жетишилген макулдашууларга карабастан, администрация кирешесинин азайышына жол бербөө жана салыктарды төлөөдөн качуунун максатында арендалык келишимдерде каралбаган кошумча акча каражаттарды алдамчылык жана мыйзамсыз түрдө ижарачылардан алууну уланткан. Ошол эле учурда базардын администрациясы жеке ижарачылар менен ижара келишимин түзгөн эмес.

Бул кылмыштуу аракеттери менен базар жетекчилиги ижарачылардан чогултулган акча каражаттарын мыйзамсыз чогулткан жана мамлекеттик бюджетке өзгөчө ири өлчөмдө салыктарды жана башка милдеттүү төлөмдөрдү төлөөдөн качкан.

Ыкчам иликтөө иш-чаралардын жыйынтыгы боюнча 2024-жылдын 7-январында “Уста Билдинг” ЖЧКсынын коммерциялык директору “М.М.М.” кармалды жана Бишкек шаарынын ШИИБ убактылуу кармоочу жайына киргизилди.

Учурда бул фактыга тиешеси бар бардык адамдарды аныктоо боюнча тиешелүү ыкчам-тергөө иш-чаралары жүргүзүлүүдө.

КР УКМК соода базарлары тарабынан алдамчылык аракеттерге жана Кыргыз Республикасынын мыйзамдарын бузууга жол берилбестигин эскертет, ишкердик жүргүзүү үчүн мыйзамсыз тоскоолдуктардын жана туура эмес шарттардын ар кандай фактылары аныкталса Кыргыз Республикасынын мыйзамдарына ылайык катуу чаралар көрүлөт.