МинКаб башчысы: Жазык-аткаруу тутумунда акыркы 2 жарым жылдын ичинде масштабдуу өзгөрүүлөр болду

Кыргыз Республикасынын Министрлер Кабинетинин Төрагасы-Президенттин Администрациясынын Жетекчиси Акылбек Жапаров Жалал-Абад облусуна жасаган иш сапарынын алкагында  Сузак районундагы № 53 тергөө изоляторунун жаңы имаратынын ачылышына катышты.

Анда Министрлер Кабинетинин башчысы мамлекет үчүн кооптуу деп табылган кылмыштуу чөйрөнү коомдон обочо кармоо-өзгөчө атайын милдет экенин айтып, шаар ичиндеги абактарды шаардын сыртына чыгаруу саясаты жүрүп жатканын белгиледи.

“Ушул биз ачып жаткан № 53 тергөө изоляторун чыгардык. Абакты Базар-Коргон районуна көчүрүп жатабыз.  Буга чейин бул изолятордо аялдар менен жашы жете элек балдар кармалып келген. Туура, жазык-аткаруу мыйзамдарынын талаптарына ылайык калктын аярлуу катмары болгон аялдар жана жашы жете элек балдарды кармоо үчүн тиешелүү шарт болгон эмес”,- деди ал.

№53 тергөө изоляторунун жаңы имаратын курууга республикалык бюджеттен 364 млн сомдон ашык каражат бөлүнгөн белгилеген Министрлер Кабинетинин башчысы өлкө боюнча капиталдык салымдарга 2 жарым жылда 49,7 млрд сом бөлүнгөнүн, анын ичинен 2023-жылга эле 26 млрд сом берилгенин белгилеп,  “Ылайым эле, көбүрөөк мектептерди ачып, жолдорду асфальттап туралы. Айла жок экен, ошол эле учурда коомубузда жаман жолго баскан жарандарыбыз да бар. Алар үчүн да эл аралык Адам укуктарынын талаптары боюнча камак шарттарын жакшыртууга аргасызбыз жана бул өкмөттүн милдети”, – деди Акылбек Жапаров.

Ошондой эле, Министрлер Кабинетинин башчысы Жазаларды аткаруу кызматынын № 10 түзөтүү мекемеси жана кайтаруу, күзөтүү департаментинин № 5 батальону мекемесинин имараттарын бузуу иштери менен таанышты. Белгилүү болгондой Жалал-Абад шаарынын ичинде жайгашкан бул абак сыртка чыгарылып, анын ордуна административдик имараттар жана сквер курулат.