Акылбек Жапаров менен БАЭнин Энергетика министри сүйлөшүүлөрдү жүргүздү
Кыргыз Республикасынын Министрлер Кабинетинин Төрагасы – Кыргыз Республикасынын Президентинин Администрациясынын Жетекчиси Акылбек Жапаров Абу-Даби шаарына (Бириккен Араб Эмираттары – БАЭ) болгон жумуш сапарынын алкагында БАЭнин Энергетика жана инфраструктура министри – БАЭнин Тышкы иштер министрлигинин БАЭнин Кыргыз Республикасы менен кызматташуу маселелери боюнча атайын өкүлү Сухейл Аль-Мазруи менен сүйлөшүүлөрдү жүргүздү.
Жолугушуунун жүрүшүндө тараптар кыргыз-эмират кызматташтыгынын кеңири чөйрөсүн талкуулашты.
МинКаб Төрагасы буга чейинки жогорку деңгээлдеги сапарлардын натыйжалуулугун канааттануу менен белгилеп, жетишилген макулдашууларды ишке ашыруу боюнча даяр экендигин кошумчалады.
Анда тараптар Кыргыз Республикасында инвестициялык долбоорлорду андан ары ишке ашыруу үчүн негиз боло турган “Абу-Даби Кыргыз Инвестмент” биргелешкен холдингинин ишмердүүлүгүн талкуулашты.
Бул багытта биргелешкен холдингдик компанияны практикалык негизде ишке киргизүүнү тездетүү зарылчылыгы белгиленди.
Андан ары тараптар энергетика, гидроэнергетика жана энергиянын кайра жаралуучу булактарын өнүктүрүү долбоорлорун ишке ашыруунун жүрүшүн кеңири талкуулашты, атап айтканда, “Масдар” компаниясы тарабынан Ысык-Көл облусунда күн фотоэлектр станциясынын курулушу айтылды.
Мындан тышкары, тараптар Кыргыз Республикасында жаштардын футбол академиясын куруу долбоорун талкуулап, долбоордун акыркы эсептөөлөрү эмират тарапка берилди.
Сүйлөшүүлөрдүн жыйынтыгында эки тарапты кызыктырган бардык долбоорлорду тездетүү боюнча макулдашууга жетишилди, тараптар бул багытта максималдуу колдоо көрсөтүүгө даяр экендиктерин билдиришти.
