Биринчи класска электрондук каттоо: 97 миң 486 бала катталды
2023-жылдын 3-июлуна карата мамлекеттик жана муниципалдык мектептердин 1-классына 97 миң 486 бала кабыл алынды, бул жалпы квотанын 52,5% түзөт.
Электрондук каттоодо баланын ата-энеси же мыйзамдуу өкүлдөрү эң көп активдүүлүктү Бишкек шаарынын Октябрь районунда – квотадан 82%, Талас облусунун Кара-Буура районунда – 79%, Нарын облусунун Жумгал районунда – 74%, Талас облусунда – 60% көрсөттү.
Эң аз активдүүлүк Жалал-Абад облусунун Сузак районунда – 36%, Ош облусунун Алай жана Ноокат райондорунда – 38% байкалды.
Биринчи класска электрондук кабыл алган 2 миң 84 жалпы билим берүү уюмдарынын ичинен 117 билим берүү мекемесинде орундар толду. Тагыраагы, Бишкекте 96 мектептин 33ү, Ош облусунда 514 мектептин 18и, Баткен облусунда 224 мектептин 14ү толду.
Белгилей кетсек, 26-июндан 31-августка чейин 1-класска электрондук каттоонун экинчи этабы өтүүдө. Экинчи этапта жашаган жерине карабастан баланы каалаган мектепке каттоого болот, эгерде бош орундар бар болсо.
