«Манас» бажысы 2,2 млн сомдон ашык контрабандалык кол сааттарды алып кирүүгө бөгөт койду

«Манас» бажысынын контрабандага жана бажы эрежелерин бузууга каршы күрөшүү башкармалыгынын кызматкерлери тарабынан Бириккен Араб Эмираттарынын Шарджа шаарынан келген аба жүктөрүн бажылык контролдоо жана текшерип кароонун алкагында декларацияланбаган товарлар аныкталган. Бул тууралуу МБКнын маалымат кызматы билдирди.

«ТСКД» ЖЧКсынын дарегине «ROLEX» соода маркасынын 5 бирдик жана «PATEK PHILIPPE GENEVE» соода маркасынын 1 бирдик оригиналдуу кол сааттары келген.

Кыргыз Республикасынын Соода-өнөр жай палатасынын экспертизасынын актысына ылайык, кармалган товарлардын орточо базардык жалпы баасы 2 миллион 292 миң сомду, ал эми тийиштүү бажы төлөмдөрүнүн суммасы 460 миң 462 сомду түздү.

Факт КБР МКЖ АДСке катталып, материалдар Кыргыз Республикасынын Башкы прокуратурасына өткөрүлүп берилди.