Тажикстан Кыргызстандын санариптештирүү жаатындагы тажрыйбасын үйрөнүүдө
“Бүгүн бизге Тажикстандын өкмөтүнөн чоң делегация келди. Алар өлкөбүздөгү санариптештирүү тармагындагы жетишкендиктер менен таанышып, үйрөнүп тажрыйба алып жатышат”, – деп жазды президенттик администрациянын маалыматтык саясат кызматынын жетекчиси Дайырбек Орунбеков социалдык тармактагы баракчасына.
Анын айтымында, бул окуя акыркы жылдары өлкөдө жүргүзүлүп жаткан реформалардын жемиши, маанилүү жыйынтыгы.
“Кечээ эле мамилебиз чыңалып турган эле. Бүгүн ынтымак өкүм сүргөн дос өлкөлөргө айландык. Президент Садыр Жапаровдун кыраакылыгы жана чечкиндүүлүгү аркасында чек ара көйгөйү биротоло чечилип, Орто Азиядагы тынчтыкты жана коопсуздукту чыңдоого өбөлгө түзүлдү.
Бир канча жыл мурда, тигил өлкөнүн башкаруу модели укмуш, бул өлкөнүн өнүгүүсү ыкчам деп суктанып жүрсөк, эми биздин жетишкендиктерди, биздин ийгиликтерди келип көргүсү келген, тажрыйба алгысы келгендердин саны арбыды.
“Кызмат” мамлекеттик мекемесинин Президенттин Иш башкармалыгына өтүшү менен санариптештирүү жаатында олуттуу кадамдар жасалды. Натыйжада «Коопсуз шаар», «Инфодокс», G-Cloud платформасы, Кызмат-ID сыяктуу бир катар алдыңкы долбоорлор ишке ашырылып, мамлекеттик кызмат көрсөтүүлөрдө ылдамдык, ачыктык жана үнөмдүүлүк камсыздалууда. Мына бул ийгиликтерди башка өлкөдөн келип үйрөнүп, үлгү катары өздөрүнүн тажрыйбасына алганы жатышат.
Садыр Жапаров жетектеген команданын ийгиликтеринин бул башаты гана. Жаркын келечекке карай кадамдарыбыз бекем болсун!”, – деп жыйынтыктады ал.
