Январь-июнда өлкөнүн ИДПсы 711 млрд сомду түздү
2025-жылдын январь-июнунда ички дүң продукт алдын ала баалоо боюнча 711,2 млрд сомду түздү. Бул тууралуу Улуттук статистикалык комитеттин төрагасы Бактыбек Кудайбергенов брифинг учурунда билдирди.
Анын айтымында, бул көрсөткүч 2024-жылдын январь-июнуна салыштырмалуу 11,7 пайызга көп.
“Өнөр жай өндүрүшүнүн өсүшү 2024-жылдын январь-июнуна салыштырмалуу фармацевтикалык продукциялардын – 1,7 эсеге, тамак-аш азыктарын (суусундуктарды кошкондо) жана тамеки азыктарын өндүрүүнүн – 44 пайызга, резина, пластмасса буюмдарын жана курулуш материалдарын өндүрүүнүн – 33,2 пайызга, жыгачтан жана кагаздан жасалган буюмдарды өндүрүүнүн, полиграфиялык ишмердүүлүк продукцияларынын – 31,4 пайызга, химиялык продукциялардын – 24,5 пайызга, тазаланган мунайзат продуктуларынын – 17 пайызга, ошондой эле пайдалуу кендерди казуу көлөмүнүн – 10,8 пайызга көбөйүшү менен камсыздалды”, – деди ал.
Ал белгилегендей, оң тенденциялар курулушта байкалды, мында көлөмдөрдүн көбөйүшү 42,5 пайызды, дүң жана чекене соода – 12,1 пайызды, ошондой эле айыл чарбасы – 3,8 пайызды түздү.
Булак “Кабар” агенттиги
