Кыргызстанда Европалык эмдөө жумалыгы башталды

Кыргызстанда Европалык эмдөө жумалыгы башталды. Ал эмдөөнүн маанилүүлүгүнө көңүл буруу жана иммунитетти чыңдоо максатында жыл сайын өткөрүлөт. Бул тууралуу бүгүн брифингде саламаттык сактоо министринин орун басары Бүбүжан Арыкбаева билдирди.

Анын айтымында, бул жылы ал “Бардык адамдык күчтөр үчүн эмдөө” урааны астында өтөт. Европалык эмдөө жумалыгы 2025-жылы өзгөчө мааниге ээ, анткени ал эмдөө боюнча негизги кампаниянын башталышын белгилейт.

“Ар кандай себептерден улам убагында эмделбей калган балдарга жеткирүү боюнча активдүү иштерди баштадык. Бул ден соолукту сактоо боюнча гана зарыл чара эмес, ошондой эле жамааттык иммунитетти калыптандыруу боюнча маанилүү кадам болуп саналат”, – деп белгиледи Арыкбаева.

Саламаттык сактоо министрлигинин маалыматы боюнча 2020-2024-жылдар аралыгында 90 миңден ашык бала профилактикалык эмдөөлөрдүн календарында каралган АКДС-3 вакцина комплексин бүтүрүшкөн эмес.

Европалык эмдөө жумалыгынын алкагында өлкөдө медициналык кызматкерлер жана жалпы коомчулук үчүн маалыматтык иш-чаралар, кампаниялар, лекциялар жана тренингдер өткөрүлөт.

Белгилей кетсек, өлкөнүн жетүүгө кыйын аймактарына өзгөчө көңүл бурулуп, көчмө медициналык бригадалар жөнөтүлөт.

Негизги максат – балдарды кызылча, кызамык, көк жөтөл жана башка коркунучтуу оорулардан коргоо.

Бүбүжан Арыкбаева өз кезегинде Кыргызстандын бардык тургундарын бул демилгени колдоого жана калктын саламаттыгын чыңдоого багытталган иш-чараларга активдүү катышууга чакырды.