Садыр Жапаров “Тоолор коркунучта: Гималайдагы жоготуулар жана зыяндарды чечүү” аттуу тегерек столго катышты
Президент Садыр Жапаров бүгүн, 13-ноябрда, Азербайжандын Баку шаарында климаттык иш-аракеттер боюнча дүйнөлүк лидерлердин саммитинин (COP29) алкагында Непал тарабынан уюштурулган “Тоолор коркунучта: Гималайдагы жоготуулар жана зыяндарды чечүү” аттуу тегерек столго катышты.
Иш-чарада сөз сүйлөп жатып, мамлекет башчысы дүйнөнүн көптөгөн тоолуу аймактарында климаттын өзгөрүшү тоо экосистемаларына жана адамдарга, анын ичинде азык-түлүк коопсуздугуна, айыл чарбасына жана жашоо каражаттарына, ошондой эле суу жана таза энергия сыяктуу негизги экосистемалык кызмат көрсөтүүлөргө терс таасирин тийгизип жатканын баса белгиледи.
“Биз тоолорго байланыштуу эл аралык саясий процесстерде, анын ичинде БУУнун Алкактык Конвенциясында жана Тоолуу аймактарды өнүктүрүүнүн беш жылдык аракет планында, тоо өлкөлөрүнүн кызыкчылыктары адилеттүү жана жетиштүү эске алынуусун колдойбуз.
Кыргызстанда биз тоолуу экосистемалардын аялуу экенин өзгөчө сезебиз, анткени алар биздин үйүбүз. Борбордук Азияда миллиондогон адамдарды суу менен камсыздаган мөңгүлөр тез арада жок болуп баратат. Бул Кыргызстандын гана эмес, бул регионалдык жана глобалдык көйгөй. Суунун тартыштыгы мындан ары да курчуй берет, бул болсо конфликттерге, туруксуздукка жана жакырчылыкка алып келиши мүмкүн”, – деп белгиледи Президент.
Ал дал ушундан улам Кыргызстан БУУда Тоо күн тартибин алдыга жылдыруу жоопкерчилигин өз мойнуна алганын, дүйнөдөгү тоолуу аймактардын өзгөчө көйгөйлөрүн таанууну колдоп жатканын айтты.
“Биз Конвенциянын алкагында Тоо жана климаттык өзгөрүүлөр боюнча диалогду жыл сайын өтүүчү иш-чара катары бекитүү демилгесин колдоого чакырабыз.
Келечекке көз жүгүртүп, климаттын өзгөрүшүнө каршы күрөш – бул жөн гана жашоо үчүн күрөш эмес, бул адилеттүүлүк, теңчилик жана абийир үчүн күрөш экенин эске алалы. Биздин тоо коомчулуктарыбыз, фермерлерибиз, балдарыбыз – бардыгы келечекте жөн гана жашап калбастан, өсүп-өнүгүүгө татыктуу”, – деп президент Садыр Жапаров сөзүн жыйынтыктады.
