2023-жылдын биринчи жарымында үй-бүлөлүк дарыгерлер тарабынан 870 миңден ашык жеңилдетилген рецепттер берилген
2023-жылдын биринчи жарымында үй-бүлөлүк дарыгерлер тарабынан 870 миңден ашык жеңилдетилген рецепттер берилген.
Милдеттүү медициналык камсыздандыруу фонду калктын жеңилдетилген дары-дармектерге жеткиликтүүлүгүн камсыз кылууну улантууда.
2023-жылдын башынан июнь айына чейин үй-бүлөлүк дарыгерлер борборлорунун, жалпы дарыгерлик практика борборлорунун жана фельдшердик-акушердик пункттардын дарыгерлери тарабынан жарандарга жеңилдетилген дары-дармектерге 870,9 миң электрондук рецепт берилген.
Рецепттердин чоң бөлүгү, тагыраагы 820 миңи 50%га чейинки жеңилдик менен камсыздандырылган жарандарга, анын ичинде кош бойлуу аялдарга, балдарга жана пенсионерлерге берилген.
Дары-дармек менен жардамга муктаж бейтаптарга, тактап айтканда, бронхиалдык астма, эпилепсия, параноиддик шизофрения, аффективдүү бузулуулар менен ооруган жарандарга жана рактын терминалдык стадиясында тургандарга 60 миңге жакын рецепттер берилген. Бул рецепттер дары-дармектерге 90%га чейин арзандатууну камсыз кылган.
Калк үчүн жеңилдетилген дары-дармектерди саткан дарыканаларга компенсациялардын жалпы суммасы 208,4 млн сомду түздү, алар өз убагында ММК фондунан каржыланды.
Үй шартында дарыланууга муктаж болгон ар бир камсыздандырылган жаранга жеңилдетилген дары-дармектерди алуу мүмкүнчүлүгү берилгенин эскертебиз.
Тиешелүү көрсөткүчтөр болгон учурда үй-бүлөлүк дарыгер 50%га чейинки арзандатуу менен электрондук рецепт бере алат. Дары-дармектерди алуу үчүн жаран дарыканага ID-картада көрсөтүлгөн рецепттин номерин жана ПИНди көрсөтсө жетиштүү.
