Өзбекстан менен Беларусь экология тармагындагы кызматташтыгын өнүктүрөт
Өзбекстандын Экология, айлана-чөйрөнү коргоо жана климаттын өзгөрүшү министрлигине караштуу Мамлекеттик экологиялык экспертиза борбору менен Беларустун Табигый ресурстар жана айлана-чөйрөнү коргоо министрлигине караштуу Республикалык экологиялык экспертиза жана кадрларды кайра даярдоо борбору кызматташтык жөнүндө меморандумга кол коюшту.
Документтин максаты — эки өлкө ортосундагы экология тармагындагы илимий жана практикалык кызматташтыкты өнүктүрүү, адистердин квалификациясын жогорулатуу жана заманбап ыкмаларды практикага киргизүү болуп саналат.
Беларусь делегациясынын жетекчиси Александр Булак белгилегендей, мындай документ Борбор Азия өлкөлөрүнүн ичинен биринчи жолу Өзбекстан менен түзүлдү. Жакынкы мезгилде ушундай эле келишимдер Кыргызстан, Казакстан жана Түркмөнстан менен да кол коюлары күтүлүүдө.
«Бул демилге аймактагы экологиялык кызматташтыкты чыңдап, Борбор Азияда биргелешкен экологиялык өнөктөштүккө жаңы мүмкүнчүлүктөрдү ачат», — деди ал.
Меморандум экологиялык экспертизанын сапатын жакшыртуу, айлана-чөйрөгө тийгизген таасирин баалоо, биргелешкен семинарлар менен форумдарды өткөрүү жана санариптик маалымат базаларын өнүктүрүү сыяктуу багыттарды камтыйт.
