Өткөн жылы республика боюнча өрт коопсуздугун бузгандарга 800 млн сом айып салынган

2024-жылы республика боюнча өрт коопсуздугун бузгандарга 800 млн сом айып салынган. Бул тууралуу Өзгөчө кырдаалдар министрлигине караштуу Өрт көзөмөлдөө кызматынын бөлүм башчысы Руслан Турдумамбетов радиолордун бирине берген маегинде билдирди.

Анын айтымында, өрт коопсуздугунун эрежелери өкмөттүн 381-беренеси менен бекитилген. Анда ар бир мекемеде, ишканаларда өрт коопсуздугу сакталышы керектиги жазылып, аны сактоого мекеменин жетекчилери милдеттүү.

“Анткени жетекчилер жумушчуну ишке алып жатканда сөзсүз түрдө өрт коопсуздугу боюнча окууту өтүшү абзел. Мындан сырткары электр жабдууларын убагында текшерип, көзөмөлдөп турушу керек. Себеби, азыркы электр зымдарынын сапаты мурдагыга салыштырмалуу начар. Тагыраагы атайын стандартка жооп бербейт. Муну менен катар социалдык мекемелерде экиден кем эмес эвакуациялык чыгуучу эшиктер болушу керек. Эрежеге ылайык, имараттарда тилсиз жоону өчүрүүчү шаймандары болушу абзел жана алар аянттарынын ар 50 сотых жеринде жайгашышы керек. Мындан тышкары ичинде автоматташтырылган өрттү өчүрүүчү жана кабарлоочу орнотмолордун болгону жакшы”,-деди ал.

Ал белгилегендей, аталган талаптардын сакталышын Өзгөчө кырдаалдар министрлигинин кызматкерлери жылына бир жолу пландуу текшерип турат.

“Талаптар сакталбагандыгы аныкталса эскертүү, түшүндүрүү иштери жүргүзүлөт. Эгерде кайталанса 143-берененин негизинде айып пул салынат. Юридикалык жактарга 23 миң сом, жеке жактарга 7 миң 500 сом”,-деди ал.

Булак “Кабар” агенттиги