Өлкөдө жашыл экономиканы өнүктүрүү программасы бекитилди

Министрлер кабинети Кыргызстанда жашыл экономиканы 2029-жылга чейин өнүктүрүү программасын бекитти.

Тиешелүү чечимге министрлер кабинетинин төрагасы Адылбек Касымалиев кол койду.

Документ жашыл экономиканын принциптерин институционалдаштырууну күчөтүү жана Кыргыз Республикасынын экономикасынын приоритеттүү секторлору боюнча макро- жана микродеңгээлдерде жашыл интервенцияларды ишке ашыруу максатында иштелип чыккан.

Токтомго ылайык, Кыргызстанда жашыл экономиканы 2029-жылга чейин өнүктүрүү программасын ишке ашыруу боюнча иш-чаралар планы, программанын индикаторлорунун матрицасы, өнүктүрүү программасынын ресурстук наркынын баасы бекитилди.

Кыргызстандын аткаруу бийлигинин мамлекеттик органдарына, президенттин облустардагы өкүлдөрүнө, жергиликтүү өз алдынча башкаруу органдарына (макулдашуу боюнча) жана иш-чаралар планын ишке ашырууга катышкан уюмдарга (макулдашуу боюнча) иш-чаралар планын сапаттуу жана өз убагында аткарууну жана Кыргызстанда жашыл экономиканы 2029-жылга чейин өнүктүрүү программасынын индикаторлоруна жетишүүнү камсыз кылуу тапшырылды.

Кыргызстандын аткаруу бийлигинин мамлекеттик органдарынын жетекчилеринин, президенттин облустардагы өкүлдөрүнүн жана жергиликтүү өз алдынча башкаруу органдарынын башчыларынын иш-чаралар планын сапаттуу жана өз убагында аткаруусу үчүн жеке жоопкерчилиги белгиленди.