Салык кызматы Ош жана Баткен облустарында маркасы жок күйүүчү майды сатуу фактыларын аныктады

Мамлекеттик салык кызматынын кызматкерлери КРнын Министрлер Кабинетинин №361 токтомун ишке ашыруунун алкагында жүргүзүлгөн рейддик салык контролунун жүрүшүндө бензинди жана дизелдик отунду милдеттүү маркалоого тиешелүү талаптарды бузуу фактыларын аныкташты.

Баткен облусундагы автомай куюучу станциялардын биринде, ошондой эле Ош шаарынын аймагында жайгашкан мунай базада маркасы жок дизелдик отунду сактоо фактысы катталган. Маркасы жок күйүүчү майдын жалпы көлөмү 950 литр жана 35 547 литр болгон. Бул фактылар боюнча материалдар колдонуудагы мыйзамдарга ылайык чара көрүү үчүн көзөмөл органдарына өткөрүлүп берилди.

Кыргыз Республикасынын 2025-жылдын 12-февралындагы № 37 “Салык салуу чөйрөсүндөгү айрым мыйзам актыларына өзгөртүүлөрдү киргизүү жөнүндө” Мыйзамына ылайык, КРнын Кылмыш-жаза кодексинин 239-беренесинде милдеттүү түрдө маркаланышы керек болгон продукцияны, анын ичинде күйүүчү май маркерин өндүрүү, сактоо, импорттоо жана сатуу боюнча жоопкерчилик киргизилген.

Эскерте кетсек, 2024-жылдын 1-октябрынан тартып Кыргызстанда импорттолуучу жана өлкөдө молекулярдык маркерлерди колдонуу менен өндүрүлгөн бензин менен дизель отунун милдеттүү түрдө маркалоо киргизилген.

Салык кызматы өлкөнүн аймагындагы эсепке алынбаган товарларды аныктоону жана жүгүртүүнү токтотуу боюнча иштерди улантууда.