Садыр Жапаров Еврокомиссиянын президенти Урсула фон дер Ляйен менен жолугушту

Президент Садыр Жапаров бүгүн, 3-апрелде, Өзбекстан Республикасына иш сапарынын алкагында Европа комиссиясынын президенти Урсула фон дер Ляйен менен жолугушту.

Жолугушуунун жүрүшүндө Кыргыз Республикасынын жана Европа комиссиясынын ортосундагы кызматташтыкты ырааттуу өнүктүрүү, анын ичинде соода-экономикалык байланыштарды кеңейтүү, инвестицияларды тартуу жана туруктуу өнүктүрүү чөйрөсүндөгү демилгелерди ишке ашыруу маселелери талкууланды.

Садыр Жапаров Борбор Азия жана Европа бирлигинин өлкөлөрүнүн ортосундагы өз ара аракеттенүүнүн форматы динамикалуу өнүгүп, иш жүзүндөгү натыйжаларды бере баштаганын баса белгиледи.

«2021-2024-жылдар аралыгында Кыргыз Республикасынын Европа бирлигинин өлкөлөрү менен соода жүгүртүүсү 2,4 эсе көбөйүп, ошол эле учурда импорт 2,6 эсеге, ал эми экспорт – 1,5 эсеге өстү.

Бул жалпы преференциялар системасын ийгиликтүү ишке ашыруу аркылуу мүмкүн болду. Биздин европалык өнөктөштөрүбүзгө бул үчүн ыраазычылык билдиребиз», – деп белгиледи мамлекет башчысы.

Ал ошондой эле кызматташуунун негизги багыттарынын бири Кыргызстандын чыныгы көз карандысыздыгын чыңдоого багытталган жаңы транспорттук байланыштарды өнүктүрүү болуп саналарын баса көрсөттү.

Өз кезегинде Европа комиссиясынын президенти Урсула фон дер Ляйен аймактык коопсуздукту чыңдоо экономикалык гүлдөп-өсүүнүн жана туруктуу өнүгүүнүн маанилүү шарты экенин баса белгиледи.

«Кыргызстан жана Тажикстандын ортосундагы мамлекеттик чек ара тууралуу келишимге кол коюу – бул аймактын алдында кеңири мүмкүнчүлүктөрдү ачкан тарыхый жетишкендик. Ал өлкөлөр ортосундагы ишенимди гана бекемдебестен, сооданын өсүшү, инвестицияларды тартуу жана ири инфраструктуралык долбоорлорду ишке ашыруу үчүн зор түрткү берет», – деп белгиледи ал.

Жолугушуунун соңунда тараптар соода-экономикалык өнөктөштүктү кеңейтүүгө, транспорттук инфраструктураны өнүктүрүүгө жана аймактык туруктуулукту бекемдөөгө умтуларын билдиришти.