Орто-Токой ГЭСинин курулушу 80 пайызга аяктады

Орто-Токой ГЭСинин курулушу 80 пайызга аяктады. Бул тууралуу Энергетика министрлигинен билдиришти.

Курулуш иштери “Чакан ГЭС” ААК тарабынан жүргүзүлүп, иштер бекитилген графикке ылайык активдүү уланууда.

Узундугу 950 метрди түзгөн деривациялык тоннелдин казуу иштери толугу менен аяктады;
Суу өткөрүүчү туннелдин темир-бетон каптамасын бетондоо иштери жүргүзүлүүдө;
Тармакталуучу түйүндөгү камеранын дубалдарын жана грунтун даярдоо жана бекемдөө иштери аткарылууда;
Үч чыгуусу бар туннелдик тармакты монтаждоого даярдык көрүлүүдө: анын ичиндеги бир чыгуусунда 93,6 метр, экинчисинде 74,4 метр металл конструкциялар орнотулуп, ширетилди.

Ошондой эле гидроэлектростанциянын имаратында курулуш иштеринин бир катар этаптары аяктады:

ГЭС имаратынын курулуш иштери 90 пайызга аяктады;
Төмөнкү бьефтеги суу агызуучу каналдын затворлорун көтөрүүчү механизмдер үчүн колонналарды арматуралоо жана бетондоо иштери толугу менен бүткөрүлдү;
Чатырдын каркасын монтаждоо иштери аяктап, учурда чатыр жабуу иштери жүргүзүлүүдө;
№№ 1, 2, 3 гидротурбиналардын жана дисктүү затворлордун монтаждоо иштери аяктады.

Эске салсак, Орто-Токой ГЭСинин кубатуулугу 21 МВт. Болжол менен курулуш иштери 2026-жылдын биринчи жарымында аяктайт.