Минэкономкоммерция жана Бажы кызматы Кыргызстандагы көзөмөл-өткөрүү пункттары үчүн электрондук кезек системасын тааныштырды
Кыргыз Республикасынын Финансы министрлигине караштуу Мамлекеттик бажы кызматында көзөмөл-өткөрүү пункттарындагы иш процесстерди оптималдаштырууга багытталган жаңы электрондук кезек системасынын бет ачары болуп өттү. Иш-чарада транспорт жана логистика компанияларынын, эл аралык соода ассоциацияларынын, ошондой эле мамлекеттик түзүмдөрдүн өкүлдөрү электрондук кезек системасынын мүмкүнчүлүктөрү, анын максаттары жана күтүлүп жаткан натыйжалары менен таанышышты. Катышуучуларга бул система чек араны кесип өтүү процессинин ачыктыгын жана ыңгайлуулугун камсыз кылып, күтүү убактысын кыскартууга, жол тыгындарын азайтууга кандайча жардам берери көрсөтүлдү.
2024-жылдын 29-ноябрында «Кызыл-Кыя автожолу» көзөмөл-өткөрүү пунктунда электрондук кезек системасынын пилоттук долбоору ишке кирээри пландалууда.
Бул долбоор Кыргыз Республикасынын Министрлер кабинетинин 2022-жылдын 8-апрелиндеги № 202 токтому менен бекитилген 2022–2025-жылдарга бажы кызматын өнүктүрүү боюнча иш-чаралар планынын алкагында ишке ашырылууда. Электрондук кезек системасынын жана күтүү зонасынын оператору болуп Мамлекеттик бажы кызматынын алдындагы «Бажы инфраструктурасы» мамлекеттик ишканасы дайындалган.
Кыргыз Республикасында электрондук кезек системасын ишке ашыруу долбоору Кыргыз Республикасынын Экономика жана коммерция министрлигинин, Эл аралык соода борборунун (МТЦ, БУУ/ДСУ) колдоосу жана Европалык союздун Борбордук Азия боюнча Ready4Trade программасынын каржылоосу менен жүзөгө ашырылууда.
