Кыргызстандын мөмө-жемиштери Европага кеңири экспорттоло баштады
Кыргызстандын мөмө-жемиштери Европа өлкөлөрүнө кеңири экспорттоло баштады. Бул тууралуу Суу ресурстары, айыл чарба жана кайра иштетүү өнөр жайы министрлигинен билдиришти.
Өлкөнүн дээрлик бардык аймактарында жана райондорунда мөмө-жемиш өсүмдүктөрүн өстүрүү үчүн жагымдуу жаратылыш-климаттык шарттар бар. Жаратылыш жапайы мөмө-жемиш өсүмдүктөрүнө — жапайы алма, өрүк, жаңгак токойлору, кулпунай, малина, бүлдүркөн жана ар кандай карагат түрлөрүнө бай.
Багбанчылык тармагы акыркы жылдары эң динамикалуу өнүгүп келе жаткан тармактардын бири болуп саналат. Баткен жана Ысык-Көл облустары бул жаатта салттуу лидерлер деп эсептелет. Чүй облусу мөмө-жемиштерди, айрыкча кулпунай жана малинаны өстүрүү боюнча, ал эми Ысык-Көл облусу кара жана кызыл карагат өстүрүү боюнча алдыңкы орунда турат.
Акыркы эки-үч жылда Нарын облусунун дыйкандарынын кызыгуусу артып, алар кулпунай жана ар кандай карагат түрлөрүн активдүү өстүрө башташты. Ысык-Көлдө жана Нарын облустарынын айрым жерлеринде да чычырканак өстүрүү демилгелери пайда болууда.
Аталган өсүмдүктөрдүн баары тоңдурууга абдан ылайыктуу, бул алардын сактоо мөөнөтүн узартып, экспорттук наркын жогорулатат. Чүй облусу өнүккөн кайра иштетүү өнөр жайы менен салттуу түрдө тоңдурулган мөмө-жемиштерди өндүрүү боюнча алдыңкы орунда турат.
Айыл чарба министрлиги донорлор менен биргеликте бул тармакка колдоо көрсөтүүнү күчөтүүдө. Атап айтканда, Ош жана Баткен облустарында Дүйнөлүк банктын гранттарын жана насыяларын колдонуп, “Экономиканы жана рынокторду өнүктүрүү” долбоорунун алкагында заманбап тоңдуруучу жабдуулар менен жабдылган ири соода жана логистикалык борборлор курулууда.
Россия жана Казакстан Кыргызстандык мөмө-жемиш продукцияларынын негизги экспорттук рыноктору бойдон калууда. Бирок, экспорт акырындык менен Европа, Түркия, араб мамлекеттери сыяктуу башка өлкөлөргө кеңейүүдө. Министрлик ошондой эле өз продукциясын Кытай рыногунда активдүү түрдө жарнамалап жатат.
