Кыргызстанда Евразиялык соода шаары жана Евразиялык логистикалык индустриалдык парк курулат

КР Соода-өнөр жай палатасынын башчысы Темир Сариев экономиканын жеке секторундагы эл аралык кызматташтык боюнча Кытай Соода палатасынын төрагасынын орун басары Люй Ян баштаган кытай делегациясы менен жолугушту. Кызматташтыктын келечегин талкуулоодо тараптар бир катар долбоорлорду, анын ичинде Кыргызстанда Евразиялык соода шаарын курууну карашты. Евразиялык соода шаары бир нече адистештирилген товардык-соода зоналарын, ошондой эле конференц-көргөзмө борборун, логистикалык паркты жана авиа жүк борборун камтыйт деп болжолдонууда. Пландалган курулуш аянты 3 миллион чарчы метрди түзүп, жалпы инвестиция 277 миллион долларга бааланган. Мындан тышкары, тараптар Ош шаарында Евразия логистикалык индустриалдык паркын куруу боюнча пландарды макулдашышты. Парктын аянты 2 чарчы километрди түзүп, аны ишке ашырууга 41 миллион доллар инвестиция жумшалат. Бул курулуш Кытай-Кыргызстан-Өзбекстан темир жолун ишке киргизүүнү эске алуу менен өзгөчө актуалдуулукка ээ болот, бул региондо логистикалык экономиканы өнүктүрүү үчүн чоң мүмкүнчүлүктөрдү түзөт.