Кыргызстанда 2025-жылдын үлгүсүндөгү жаңы паспорттор киргизилет

Министрлер кабинети Кыргызстандын жарандарынын улуттук паспортторунун айрым типтерин киргизүү маселелери жөнүндө токтом кабыл алды. Тиешелүү чечимге министрлер кабинетинин төрагасы Адылбек Касымалиев кол койду.

Анын максаты Кыргызстандын аймагында кыргыз жаранынын 2025-жылдын үлгүсүндөгү паспортун (ID-карта), кыргыз жаранынын 2025-жылдын үлгүсүндөгү жалпы жарандык паспортун киргизүү.

Токтом менен Кыргыз Республикасынын жаранынын 2025-жылдын үлгүсүндөгү идентификациялык картасы –  паспорту (ID-карта) жөнүндө жобо, Кыргыз Республикасынын жаранынын 2025-жылдын үлгүсүндөгү жалпы жарандык паспорту жөнүндө жобо кабыл алынды.

Кыргыз Республикасынын жарандарынын 2024-жылдын үлгүсүндөгү паспортторун (ID-карта), Кыргыз Республикасынын жарандарынын 2023-жылдын үлгүсүндөгү жалпы жарандык паспортторун берүү ушул паспорттордун бланктары аяктаганга чейин жүргүзүлөт.

Кыргыз Республикасынын жарандарынын 2025-жылдын үлгүсүндөгү паспортторун (ID-карта), Кыргыз Республикасынын жарандарынын 2025-жылдын үлгүсүндөгү жалпы жарандык паспортторун берүү Кыргыз Республикасынын жарандарынын 2024-жылдын үлгүсүндөгү паспортторунун (ID-карта), Кыргыз Республикасынын жарандарынын 2023-жылдын үлгүсүндөгү жалпы жарандык паспортторунун бланктары аяктагандан кийин жүргүзүлөт.

Кыргыз Республикасынын президентинин Иш башкармалыгына караштуу “Кызмат” мамлекеттик мекемесине Кыргыз Республикасынын жарандарынын 2025-жылдын үлгүсүндөгү паспортторун (ID-карта), Кыргыз Республикасынын жарандарынын 2025-жылдын үлгүсүндөгү жалпы жарандык паспортторун жекелештирүүгө ыйгарым укук берилди.