Кыргызстан – дүйнөлүк эпостордун башын бириктирген ири аянтчага айланууда

Бүгүн, 17-майда Ош шаарынын борбордук аянтында Дүйнөлүк эпостордун VII эл аралык фестивалы расмий ачылды.
Салтанаттуу ачылышка Кыргыз Республикасынын Мамлекеттик катчысы Сүйүнбек Касмамбетов, Кыргыз Республикасынын Жогорку Кеңешинин Төрагасынын орун басары Джамиля Исаева, Маданият, маалымат, спорт жана жашатр саясаты министринин биринчи орун басары Кайрат Иманалиев, “Түрксой” Эл аралык уюмунун башкы катчысы Султан Раев, Президентинин Ош облусундагы ыйгарым укуктуу өкүлү Элчибек Жантаев, шаар жетекчилиги жана расмий келген коноктор, коомдук ишмерлер, чет мамлекеттерден келген катышуучулар катышты.
Иш- чараны Маданият, маалымат, спорт жана жашатр саясаты министринин биринчи орун басары Кайрат Иманалиев ачып, эпос фестивалынын маанилүүлүгүн жана жетинчи ирет өтүп жаткан эл аралык иш- чаранын кадыры артып, жыл өткөн сайын катышуучу өлкөлөрдүн саны өсүп, ага болгон кызыгуу артылып, Кыргызстан – дүйнөлүк эпостордун башын бириктирген ири аянтчага айланып жатканын белгиледи.
Ал эми, Кыргыз Республикасынын Мамлекеттик катчысы Сүйүнбек Касмамбетов Кыргыз Республикасынын Президенти Садыр Жапаровдун куттуктоосун окуп жатып, мамлекет эпикалык мурастардын сакталышына өзгөчө маани берип, дүйнөлүк эпостордун эл аралык фестивалын ар дайым колдоп келгендигин жана ал уланаарын баса белгиледи.
Андан соң, “Түрксой” Эл аралык уюмунун башкы катчысы Султан Раев аталган фестивалдын негизделиши, анын ушул күнгө чейин үзгүлтүксүз уланышына маани берип, аталган долбоордун координатору Дамира Алышбаевага “Түрксой” Эл аралык уюмунун сыйлыгын тапшырды.
Салтанаттуу иш- чара атамкендик жана чет элдик өнөр ээлери катышкан концерттик программа менен коштолуп, “ЭлТР” мамлекеттик телерадиокомпнаиясы тарабынан түз көрсөтүлдү.
Дүйнөлүк эпостордун VII эл аралык фестивалы 20-майга чейин уланат.

Связанный пост