Кыймылсыз мүлккө нотариалдык алымдар азайды
Кыргызстанда кыймылсыз мүлккө менчик укугун өткөрүү боюнча бүтүмдөрдү нотариалдык күбөлөндүрүү үчүн мамлекеттик алымдын өлчөмдөрү төмөндөтүлдү.
Юстиция министрлигинен билдиришкендей, тиешелүү өзгөртүүлөр министрлер кабинетинин 2026-жылдын 23-июлундагы №505 токтому менен кабыл алынды.
Өзгөртүүлөргө ылайык, накталай эмес эсептешүүдө жакын туугандардын ортосундагы бүтүмдөр үчүн алым 1 000 сомдон 300 сомго, башка жеке жактар үчүн 2 000 сомдон 500 сомго, ал эми тараптардын бири юридикалык жак болсо, 5 000 сомдон 1 000 сомго чейин азайтылды.
Накталай эсептешүүдө алым тиешелүүлүгүнө жараша 10 000 сомдон 3 000 сомго, 20 000 сомдон 5 000 сомго жана 50 000 сомдон 10 000 сомго төмөндөдү.
Мындан тышкары, юридикалык жак катышкан учурда нотариалдык буйрук берүү үчүн алым өндүрүлүүчү сумманын 1 пайызын түзөт. Анын өлчөмү бир эсептик көрсөткүчтөн кем эмес жана 50 эсептик көрсөткүчтөн ашпоого тийиш.
