Чүйдө адам өлтүрүүгө аракет кылган УКТ мүчөлөрү кармалды

Атылбас курал менен кол салууну уюштурган уюшкан кылмыштуу топтун мүчөлөрү кармалды. Бул тууралуу Улуттук коопсуздук мамлекеттик комитетинен билдиришти.

Атайын кызматтын маалыматына караганда, алдын ала макулдашуу боюнча адамдардын тобу тарабынан киши өлтүрүүгө аракет кылуу фактысы боюнча А.у.Б., М.Н.М., Ч.у.Э. жана С.А.С. аттуу УКТнын мүчөлөрүн кармады.

2025-жылдын 31-мартында Чүй облусунун Новопавловка айылында жайгашкан “Халва” чайканасынын аймагында уюшкан кылмыштуу топтун төмөнкү мүчөлөрү: А.у.Б., М.Н.М., Ч.у.Э. жана С.А.С. тарабынан Н.у.Б. аттуу жаранга катуу кол салуу болуп, ал көп жолу бычактан жараат алып, оор абалда аймактык ооруканага жаткырылган.

Ыкчам-издөө иш-чараларынын жүрүшүндө бычактоого тиешеси бар адамдар ысык издер менен кармалган. Алар уюшкан кылмыштуу топтун активдүү мүчөлөрү катары ИИМдин ыкчам каттоосунда турган бир нече жолу соттолгондор болгон.

Азыркы учурда ИИМдин убактылуу кармоочу жайына киргизилди.

УКМК өз компетенциясынын чегинде уюшкан кылмыштуу топторго жана жамааттарга каршы аракеттенүү, ошондой эле спорт менен алектенген жаштарды криминалдык элементтерге аралашуусун алдын алуу боюнча иштерди улантууда.

УКМК жарандарды уюшкан кылмыштуу топтор тарабынан мыйзам бузуунун бардык учурлары боюнча байланышууга жана билдирүүгө чакырат.